Albistea entzun

Komunitate logika sendotzera

Publikotasuna birdefinitzeko eztabaida betean dira ikastolak. Publikoa estatuarekin eta pribatua merkatuarekin lotzen dituzten dikotomietatik ateratzea proposatu dute.
Koldo Tellitu, atzoko ikastaroan, lepo betetako aretoan.
Koldo Tellitu, atzoko ikastaroan, lepo betetako aretoan. JON URBE / FOKU Tamaina handiagoan ikusi

Maite Asensio Lozano -

2019ko uztailak 9 - Eibar

Mezu elektroniko batek eragin zion kezka Edu Apodaka soziologoari. EHU Euskal Herriko Unibertsitatearen eta UEU Udako Euskal Unibertsitatearen arteko hitzarmen baten harira —bietako kide da Apodaka—, bidaltzaileak galdetu zion itunak ez ote zuen ekarriko unibertsitate publikoaren jarduna pribatizatzea. «Erantzun nion Euskal Herrian ezin dugula pentsatu publikoaren eta pribatuaren artean dauden diferentziez beste leku askotan pentsatzen den modu berean. Gure publikotasuna beste modu batean pentsatu eta gauzatu izan dugu». Handik gutxira, iritzi artikulu bat argitaratu zuen BERRIAn, eta dikotomia horren hausturaren beste hainbat adibide aipatu zituen: BERRIA eta herri ekimeneko hedabideak, gaztetxeak, Bilboko konpartsak... eta ikastolak. Gaiak hezkuntza komunitatean piztu zuen eztabaidari jarraipena eman zioten atzo Eibarren (Gipuzkoa), hain justu, UEUk antolatutako ikastaro batean: Ikastolak eta kooperatibismoa: publikotasun berri baten bila.

Publikotasuna birpentsatzea proposatu du Apodakak, eta, horren premia agerian uzteko, filosofia politikora jo du, publikoa eta pribatua nola definitu diren azaltzeko: «Gizarte modernoetan, bi arlo banatu ditugu: batetik, publikoa, orokortasunari dagokiona, besteen aurrean egiten dena, gardena, sarbide librekoa; eta bestetik, pribatua, hortik kanpo geratzen den guztia». Soziologoaren arabera, estatuak zehaztu izan du zer den publikotasuna: «Estatu arrazoia monopolizatu nahi duten hierarkiek erabakitzen dute zer den publiko eta zer pribatua; edo, bestela esanda, zer den nazioa eta zer herria. Estatuek definitu dute zer den publikoa, eta horren atzean badago nazioaren kontzeptu politikoaren neutralizazioa».

Funtsean, nazio-estatuaren eredu frantziarraz jardun da soziologoa, Espainiako Estatuan ere horixe ezartzen saiatu baitira: «Estatua zen nazioaren ordezkari eta gauzatze instituzional bakarra, eta estatuaren eta banakoen artean ezin zen ezer egon». Hala sortu dira publikoa-estatua eta pribatua-merkatua bikoteak; baina dikotomia horietatik kanpo harreman asko geratu direla nabarmendu du: etxekoak, afektiboak, elkartasunezkoak, ekonomikoak... «Gaur egun gero eta gehiago hitz egiten da harreman horiez: komunitateaz».

Hain justu, horiek ditu oinarrian Apodakak «euskal izatea eta egitea» esaten diona: «Homogenizazioa ezarri ahala, erresistentziak agertu ziren; besteak beste, ikastolen eta antzeko egitasmoen bidez. Estatuek diferentzia onartzen dute, bigarren edo hirugarren mailan jarriz, baina diferentzia guztiek ez dute onartzen menpean egotea, eta parez pare jartzen diote euren izana estatuari». Horrelaxe sortu dira eta sortzen ari dira hainbat herri egitasmo. «Ezaugarri komun batzuekin: inplikatuta daudenen parte hartze zuzena, atxikimendua eta elkarlana».

«Herri mugimendua»

Eta halaxe jaio ziren ikastolak ere, 1960ko hamarkadan, Koldo Tellitu Ikastolen Elkarteko lehendakariak gogora ekarri duenez: «Kulturan eta hezkuntzan zeuden hutsuneen aurrean gizarte erantzun autonomo eta autoeratua emateko sortu ziren, ohiko eskolaren alternatiba izateko». Oinarrian dituzte hiru zutabe: euskara berreskuratzea, euskal kultura transmititzea eta hezkuntza egitasmoa garatzea. «Baina ez gara soilik ikastetxeak: gizarte mugimenduaren nortasuna izan dugu hasieratik».

Dikotomia zaharretatik aldenduta, «komunitatearen logikan» ikusten ditu Tellituk ikastolak. Beraz, haien publikotasuna defendatu du, baina ez titulartasunari lotuta, baizik eta komunitateari lotuta: «Gure ustez, ikastetxe bat publikoa izateko ez da ezinbestekoa administrazioaren titulartasunekoa izatea». Izan ere, Hego Euskal Herriko ikastola gehienak kooperatibak dira egun —Ipar Euskal Herrikoak, berriz, kultura elkarteak—: «Ez da formula juridiko hutsa, helburu bat adierazten du: benetako partaidetza lortzea, ikastolen erabaki organoetan hezkuntza komunitateko partaideek elkarrekin har ditzaten erabakiak». Nabarmendu du horretarako nahi dutela titulartasuna: «Ikastetxearen erabaki nagusiak hezkuntza komunitatearen esku egoteko: hezkuntza proiektua definitzea, barne antolaketa zehaztea, baliabideen kudeaketaz erabakitzea edota langileen kontratazioa adostea. Proiektuaren ardura gurea delako».

Euskalgintzan eta kooperatibagintzan «aliatuak» bilatzeaz ere mintzatu da Tellitu. Antzekoak baitira izaeran: «Gizarte beharrei herriak erantzuten die. Azken finean, komunitateen logikatik datozen balioak instituzionalizatzean datza kooperatibismoa. Demokrazia sozialaren ikuspegi berritua dakargu». Baina kezkak ere antzekoak dituzte: «Gurean ere jaitsi egin da partaidetza. Formula berriak bilatu behar ditugu, orain artekoek ez baitute balio; partaidetzak motibagarria izan behar du, ez zama bat». Ildo horretan, ohartarazi du halako proiektuak zaindu egin behar direla: «Ondo elikatzen ez den lorea zimeldu egiten da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gaindegiaren webgunea, artxiboko irudi batean. ©

Munduko batez besteko gas emisioak halako bi isurtzen da Euskal Herrian

Iosu Alberdi

Gaindegiak '2022ko adierazle galeria nagusia' txostena osatu du, lan publikoaren eten baten ostean. Datu demografikoak, ekonomikoak, sozialak eta ingurumen arlokoak landu ditu. 

Lezetxikiren Lagunak taldekoek ateratako argazki batzuk, Lezetxikoko galeria suntsituan. ©LEZETXIKIREN LAGUNAK

AHTaren tunel batek Lezetxikin kalteak egin dituela salatu dute

Xabier Martin

Aztarnategi baliotsuaren gertuko galeria bat suntsitu du tunelak, espeleologo batzuek dokumentatu dutenez. Euskal Herriko giza aztarnarik zaharrenak topatu dituzten lekua da Arrasateko koba
artxibok argazkia, marxoak 8ko manifestazioa Baionan ©Guillaume Fauveau

Frantziako Senatuak abortatzeko eskubidea Konstituzioan idaztearen alde bozkatu du

Garazi Aduriz Zuñeda

Atzo bozkatu zuen Senatuak. 166 boz alde izan zituen, eta 152 boz kontra.

Eusko Legebiltzarreko osoko bilkura, gaur goizean ©Endika Portillo/ Foku

Donostia ospitaleko auzia «elkarrizketaren bidetik» konpontzeko eskatu du Eusko Legebiltzarrak

Edurne Begiristain

EAJren eta PSE-EEren testua onartu du ganberak. Oposizioak, aldiz, salatu du auziaren erroan Osasun Sailaren kudeaketa eredua dagoela, eta galdegin du neurri oro partekatuak izan daitezela Donostialdeko ESIko  zuzendaritza eta ordezkaritza organoekin.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...