G7koen bilerak eragindako kalteen ordaina jasoko dute Lapurdiko 412 enpresak

Joan den agorrilean antolatu zuten Miarritzen G7koen goi bilera. Lapurdi kostaldeko lantoki eta denda askotan beldurra eta kezka eragin zituen ekitaldi hark, udako sasoi bete-betean turista gutxiago izango zela aurreikusten baitzuten. Frantziako Gobernuak, hainbat komunikazio operazioren bidez, dendetako nagusi eta langileak lasaitu nahi izan zituen, eta kalte-ordainak izango zirela hitzeman zuen. Atzo, Frantziako Ekonomia Ministerioak jakinarazi zuen 412 enpresak kalte-ordaina jasoko dutela goi bilera horrek «eragindako trabagatik»; orotara, 1.161.000 euro. Lapurdiko 584 enpresak egin zuten galdea; hortaz, %70ek lortuko dute diru zama bat, azaro hastapenetik goiti.

Frantziako Ministerioak adierazi du 412 enpresa horietatik gehienak «txikiak» direla —urteko irabazia 500.000 eurotik behera dute—. Kalte-ordainak galdegin zituzten enpresa gehienak Miarritzen daude (%59), Baionan ia laurden bat (%22,5), eta gainerakoak Angelun, Hendaian, Bidarten eta Urruñan, denak ere Lapurdiko kostaldean.

Enpresa horiek urrian egin behar izan zuten kalte-ordainak jasotzeko eskaria, eta hau frogatu behar izan zuten: 2017. eta 2018. urteetan agorrilean izan zituzten irabaziak aurkeztu, konparatu, eta galerak izan zituztela frogatu. Eremu zehatz bateko enpresek soilik egin zezaketen galdea.