Nahi bai, baina ezin

Markagailua.17-6; 34-18; atsedenaldia; 53-33; eta 71-50.

Ametsetik esnatu behar izan du Araskik. Zaragozak zaleen aupada jaso zuen, eta nagusi izan zen, hasi eta buka. Lehen zatian alde nabarmena lortu zuen etxeko taldeak, eta bigarren zati hasieran Araski suspertu bazen ere, ameskeria hutsa izan zen. Zaragozak min handia egin zuen saski azpian, eta kanpotik ere asmatu zuten, gainera. Etxekoek partida osoa jokatu zuten erasoan zein defentsan, eta merezimendu osoz lortu zuten finalerdietara sailkatzea.

Giroa gori-gori zegoen Felipe Printzea pabiloian, baina jokalariek urduri hasi zuten neurketa. Jaurtiketa asko huts eginda hasi zuten partida Zaragozak zein Araskik. Etxekoek, baina, lan bikaina egin zuten defentsako lanean, eta pixkanaka korrika egiteko aukera izan zuten, neurketako lehen aldeak hartuz. Oso defentsa oldarkorra proposatu zuen Zaragozak, eta arazoak izan zituzten Maria Asurmendik eta Flor Chagasek taldea gidatzeko. Zaragozak ez bezala, Araskik ez zuen korrika egiteko biderik topatzen, eta bost bosten aurkako jokaldietan ez zuen asmatu. Lehen hamar minutuetan sei puntu soilik sartu zituzten, eta Zaragozak saski azpian topatu zuen izarra. Markeisha Gatling nahi bezala aritu zen, eta arabarrek ez zuten gelditzen jakin.

Bigarren laurdenean ez zen partidaren norabidea aldatu. Zaleen aupada jasota bizi jokatu zuen Zaragozak, eta joko azkar horrekin jaurtiketa onak aurkitu zituzten. Asmatu ere asmatu zuten kanpoko jaurtiketetan Vega Gimenok eta Leonie Fiebichek. Arabarren artean Txell Alarcon izan zen saskira gogor joaten ari zen bakarra. Tanaya Atkinson guztiz osatu gabe iritsi da Kopara, eta hori taldeak antzeman zuen. 34-18 iritsi zen neurketa atsedenaldira, Asurmendik azken segundoan lortutako hiruko bati eskerrak.

Bigarren zatia beste modu batean hasi zuen Araskik. Asurmendiren hiruko horrekin beste tenple batean irten ziren kantxara, eta hiruko marratik asmatuta zortzi puntura hurbildu ziren lau minutuan (37-29). Une horretan iritsi zen,ordea, bigarren zatiko mugarria. Carlos Canterok hutsartea eskatu zuen, eta errieta egin zien jokalariei. Berehala aldatu zuten txipa etxekoek, eta 16-0eko partziala lortu zutenhiru minutuan: 53-29. Gatlingek maisutasunez dominatu zuen zona, eta arabarrek ezin izan zuten gelditu. Lau minutu iraun zion susperraldiak Araskiri, eta maldan gora jarri zitzaion neurketa berehala.

Azken laurdenera alde nabarmenarekin iritsi zen Zaragoza, eta Urietak zonakako defentsa bat jarri zuen (2-3). Etxeko taldearen erritmoa moztea lortu zuen prestatzaile arabarrak, baina aldea ez zen gehiegi mugitu, eta 71-50 amaitu zen neurketa.

Gernikaren txanda gaur

Gaur jokatuko dira Espainiako Kopako beste bi final-laurdenak. Arratsaldeko lehen partidan ariko da Gernika (18:00, Tdp). Uni Girona izango dute aurkari bizkaitarrek, txapelketa irabazteko faboritoetako bat. Lesioen ondorioz koxka bat behera egin du Kataluniako taldeak, baina azken asteetan egin dituzten fitxaketekin talde handi batekin iritsi dira Kopara. Gernikan berriz Julie Wojta osatu da, eta jokalari guztiak prest izango ditu Anna Montañanak.

Bestalde, Maria Eraunzetamurgilen Estudiantesek galdu egin zuen atzo Valentziaren aurka, eta hauek ere Kopatik kanpo gelditu dira.