Albistea entzun

Euskal presoak. Manifestazioak

IZURRIAK EZ DU ELKARTASUNA ETEN

Milaka lagunek euskal presoen aldeko urratsak egiteko eskatu dute, 200 bat mobilizaziotan, eta jendetsua izan da Bilboko manifestazioa ere, baina ezohikoa. Sarek nabarmendu du salbuespenezko politikak amaitzeko ordua dela: «Ez dugu pribilegiorik nahi, justizia eta giza eskubideak baizik».
Manifestazioaren burua, atzo.
Manifestazioaren burua, atzo. ARITZ LOIOLA / FOKU Tamaina handiagoan ikusi

Gotzon Hermosilla -

2022ko urtarrilak 9 - Bilbo

Presoen eskubideen aldeko Bilboko manifestazioa ezin izan dute ohiko moldean egin aurten ere, osasun egoerak galarazi duelako; eta Sarek nahiago izan du bere aldarria hiri eta herrietara eramatea, berrehun bat manifestazioren bidez. Milaka herritar elkartu ziren horietan, eta baita Bilboko kaleetan ere, espetxeetako «salbuespen egoera» buka dadila eskatzeko. Bilbo inguruko eskualdeetako herritarrak Bizkaiko hiriburuko manifestazioan parte hartzera deiturik zeuden, eta horrek ekarri du mobilizazioa jendetsuena izatea, segurtasun neurriak gordeta, betiere.

17:00etan abiatu zen manifestazioa Bilboko Plaza Eliptikotik. Mobilizazioaren buruan euskal presoen senitartekoak joan ziren, lau zutabetan banaturik eta elkarren arteko aldea gordez, eskuetan presoen herriratzea adierazten duten geziak zeramatzatela.

Horien ostean pankarta nagusia zetorren, Bidean leloarekin. Sareko bozeramaile eta ordezkariek eusten zioten pankarta horri: han zeuden Joseba Azkarraga, Begoña Atxa, Iñaki Lasagabaster eta beste zenbait. Atzetik, herritar multzo handia, ilaratan joan gabe baina elkarren arteko distantzia gordez.

Manifestazioa txalo artean abiatu zen, eta txalo artean iritsi zen udaletxearen aurreko aldera, Plaza Biribila igaro ostean. Euskal presoak etxera, Espetxeak apurtu eta antzeko oihuak entzun ziren manifestazio osoan. Udaletxera iritsitakoan amaierako ekitaldiari ekin zioten, oraindik udaletxeko zubitik jende andana iristen ari zela.

Ideologiari erreparatu barik

Manifestazioa amaitutakoan, Sareko bozeramaile Arantza Aldezabalek eta Joseba Azkarragak eskerrak eman zizkieten Bilbon eta gainerako herrietan bildutakoei: «Ez dugu begiratzen nork egiten duen bidea gure ondoan. Berdin zaigu zer ideologia duen edo zer alderditakoa den. Garrantzitsua da giza eskubideak elkarrekin defendatzea».

Sareko eledunek adierazi zutenez, euskal presoei ezartzen dieten «salbuespen erregimenak» indarrean dirau. Aitortu zuten presoen urruntzeari dagokionez «zerbait» aurreratu dela, baina oraindik preso asko Euskal Herritik urrun atxikitzen dituztela salatu zuten. «Amaiera eman behar diogu egoera horri», azaldu zuten: «Euskal preso guztiek Euskal Herriko espetxeetan egon behar dute, haien eskubidea delako, eta espetxeetako eskumena transferitu ondoren jarraipen positiboa eta humanitarioa egiteko aukera dagoelako».

Urruntzea ez ezik, graduen progresioaren «blokeoa» eta espetxe baimenak lortzeko zailtasunak ere aipatu zituzten: «Ez dugu pribilegiorik eskatzen; justizia eskatzen dugu. Giza eskubideak aldarrikatzen ari gara».

Sareren bozeramaileek gogora ekarri zuten Eusko Jaurlaritzak duela ehun egun hartu zuela bere gain espetxeetako kudeaketaren eskumena. «Zain gaude», erantsi zuten: «espetxe politika humanizatua aplikatzeko jarduketa irizpide berriak ezarri behar dira». Itxaropena azaldu zuten, baina ohartarazi zuten hori egin ezean behin eta berriro gogoraraziko dietela egiazko bakeak «ausardia, gizatasuna, legeari errespetua eta askatasunarekin konpromisoa» behar dituela.

Manifestazioaren geldialdi batean, Azkarragak erantzun egin zion Irune Berasaluze jeltzaleak esandakoari. Berasaluzeren ustez, presoen aldeko mobilizazioak «kaltegarri» suerta daitezke «lan politikorako». Azkarragak, berriz, uste du «bateragarriak» direla: «Gobernuak ez dira berez mugitzen, mugiarazi egin behar dira».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Aurreko lerroan, Beatriz Artolazabal sailburua, txostenaren egileen artean. ©Berria

Artolazabalek «gogoeta» eskatu du Espainiako Segurtasun Indarrek pairatutako «bidegabekeria onartezinaz»

Gotzon Hermosilla

Txosten bat aurkeztu dute, ETAk Guardia Zibilaren eta Espainiako Polizia Nazionalaren kontra egindako atentatuak aztertzen dituena

Bingen Zupiria Eusko Jaurlaritzako bozeramailea, artxiboko irudi batean. ©Jaizki Fontaneda / FOKU

Zupiria: «Ezin dugu gure historia zuritu»

Oihane Puertas Ramirez

Eusko Jaurlaritzako bozeramailea Radio Euskadiko Boulevard saioan egon da, eta, adierazi duenez, azkenaldian pertsona batzuk «zuritzeko» zenbait ekintza egiten ari dira. Besteak beste, Mikel Antza, Rodolfo Martin Villa eta Txillardegi aipatu ditu.

 ©IñIGO URIZ / @FOKU

«Zigorren helburu nagusia heztea da»

Maddi Ane Txoperena Iribarren

Laneratzea, gizarteratzeko. Hori du asmo nagusia Eusko Jaurlaritzaren Aukerak erakunde berriak. Ibilbide «indibidualizatuak» egin nahi dituzte presoekin, prestakuntza eta lan eskaintzak haien neurrira egokitzeko.
Enrique Maia Iruñeko alkatea. ©Iñaki Porto / EFE

EH Biduk, Geroa Baik eta PSNk Enrique Maia arbuiatzeko adierazpena egingo dute udalean

Berria

Adierazpen xenofoboak «daturik eman gabe» egitea eta «kolektibo oso ahulak jomugan jartzea» egotzi diote Iruñeko alkateari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.