Albistea entzun

MELE

Maleta

Goiatz Labandibar -

2021eko abuztuak 8

Maleta egitea artea da. Izaten da ohitura pertsonak A eta B kategoriatan banatzekoa: hau egiten dutenak edo ez. Pizza ananarekin gustatzen zaienak eta ez zaienak. Mikel Laboaren zaleak, edo Benito Lertxundirenak. Patata tortilla tipularekin edo gabe jaten dutenak. Iratzargailuak jo orduko jaikitzen direnak edo bost minutuka atzeratzen dutenak esnatzeko momentua. Eta badaude maletak egiten dakitenak, eta ez dakitenak. Bigarren horietakoa naiz ni. Toalla, xira, errekako sandaliak, eguzkitarako krema, Fortasec, tanpoiak... beti ahazten zait eramatea ebidentea eta beharrezkoa den gauzaren bat (abantaila: hurrengoan sartzen dudan lehenengoa horixe izaten da, azkeneko aldian ahaztu nuena; nahiz eta agian, pijama ahaztuko dudan hurrengo horretan).

Maleten arabera nolakoa zaren dioten ikerketak badaude. Baldin badaude izen-abizenen eta lanbidearen arteko loturak aztertu dituzten unibertsitate-ikerketak, nola ez da ba maletei buruzkorik egongo? (Egia berdaderoa da izen-abizen eta lanbideen arteko loturen ikerketarena, AEBtako Wayne Estatuko Unibertsitateak egin zuen). Ikerketa horien arabera, batek daraman maletaren arabera jakin daiteke lehenengoz elkarrekin bidaiatzen duten bikotea diren, abenturazaleak, ohiko bidaiariak, familia osoak…

Nire maleta abiblofobiko batena izan ohi da. Libururik edo irakurgairik gabe geratzeko beldurra da abiblofobia. Larritasuna eta itomena sentitu izan duzue noizbait oporretara eramandako azken liburua geroz eta orrialde gutxiago geratzen direlako bukatzeko? Horregatik, nahigabe hori sentitu baino, nahiago izaten dut maleta liburuz bete —liburu askoz bete— eta batzuk irakurri gabe bueltatu.

(Maleta egiten ari bazarete, gomendio bat: Sergei Dovlatovek idatzi eta Amaia Apalauzak itzulitako Maleta liburua sar ezazue).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.