Albistea entzun

MELE

Intsumisioaren nostalgia

Iban Zaldua -

2020ko abuztuak 30

Nik ulertzen dut intsumisioaren itzulerarena: nostalgiaren industriak funtzionatzen duen arau berari erantzuten dio. Duela gutxira arte 80ko hamarkada izan zen, eta maila orotan ikusten zen hori: telesailetan, musikan… Are umeentzako filmetako keinutxoetan, seme-alabekin zinema aretora zihoan gurasoak, logika demografikoari jarraiki, gaztetan bizi izan zuelako garai hura. Eta umeekin batera marrazki bizidunak ikustearen asperdura mortala gainditzeko ondo dagoelako, noizean behin, nostalgiaren gailuek eragindako endorfina-deskarga arin bat.

Orain, ordea, 90eko hamarkadaren txanda da: target berria helduaro betera iritsitako publikoa litzateke. Eta intsumisioa, 80ko hamarkadaren amaieran hasi arren, kontu noventero bat da, batez ere.

Desobedientzia zibila erabiliz, intsumisioaren aldeko kanpainak garaipen ikusgarri bat lortu zuen, noski, halakotzat hartzen badugu Aznarrek 2001ean dekretatutako soldaduskaren suspentsioa. Baina hori al zen mugimendu antimilitaristaren zio nagusia? Ez nago guztiz ziur: soldaduskaren aurkako borrokak jendea aktibatzeko abiapuntu izan nahi zuen, baina helburua armadarik gabeko gizarte bat zen. Eta ez dirudi lortu denik: Espainia eta mundua sekula baino militarizatuago daude. Baita Euskal Herria ere: zaintzen gaituzten polizia guztiei eta gure arma-industriari begiratu bat ematea nahikoa da.

Ba al dago, ordea, nostalgiarako euskarri sendoagorik, hamarkada hartan, egungo adin bateko euskal progreontzat? Leitzarango autobiaren aurkako mobilizazioa? Lizarra-Garaziko hitzarmena? Kale borroka delakoa? «Minaren sozializazioaren» bidean amildutako ETA?

Nekez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.