HIZPIDEAK

Haririk gabeko jantzia

Jakes Goikoetxea -

2018ko apirilak 25
Guardia Zibila irudimena eta zerbait gertatzeko nahia asko zukutzen ari da logikoa eta sinesgarria izan daitekeen tanta bakar bat lortzeko. ETA, Alde Hemendik mugimendua, Ospa Egunak eta auzipetutako Altsasuko gazteak lotuko dituen hari bakar bat aurkezteko behintzat. Terrorismo delituak zuritzeko froga izpiren bat, egiantzekotasun apurren bat. Baina atzo eta aurreko egunetan ikusitakoaren arabera, ez dago ez tantarik, ez haririk, ez izpirik, ez eta apurrik ere. Pentsa, atzo aurkeztutako lotura nagusia duela 18 urte Olatzagutiko gaztetxean aurkitutako eskuliburu bat izan zen. Hortik aurrera, Guardia Zibilaren iritziak, aditu izaeraz jantziak. Guardia Zibila guztia baita Altsasuko gazteen kontrako epaiketan: biktima, lekuko eta aditu.

Aditu izaera horretaz baliatuta, guztia ETArekin eta ETAren helburuekin lotzeko baieztapen biribilen ondoren, defentsako abokatuen galderei erantzunez, ez frogarik, ez loturarik, ez bortizkeria ekintzarik... Altsasun eta Euskal Herriko beste hainbat herritan ez dituztela guardia zibilak eta poliziak bertan nahi, eta hori plaza publikoan erakusten dutela baino ez, guardia zibilak desitxuratuz eta irrigarri utziz, festa giroan. ETAren estrategiaren barruan omen zegoen guardia zibilak zenbait tabernatan ez sartzea. Hori da maila, hori da neurria, gazte batzuk terrorismoagatik zigortzeko adina.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna