Justizia, arma

A morrua eragin du atzo Nafarroako Auzitegiak 2016ko sanferminetako bost bortxatzaileei jarritako zigorrak. Haserrea, ordea, ez du zigorraren urte kopuruak eragin, baizik eta epaiak adierazteak bortizkeriarik ez zela izan etxe atari horretan. Epaiketan garbi geratu zen zer gertatu zen han, eta epaileek eurek frogatutzat eman dute gertatu zela emakumeak salatutakoa. Ulertezina da, horregatik, abusutzat jotzea indarkeriarik ez dagoelakoan. Bortizkeriak bereizten ditu abusu eta sexu eraso delituak, eta bortxaketa bat bere horretan kolpe edo eraso fisiko bat izango ez balitz bezala eman dute epaia epaileek. Aldez aurretik asmo txarrez inguratu diren bost gizonen gorpuak emakume baten nahiaren kontra arma bat ez balira bezala. Bortxaketa bat izan zen, eta bortxaketa bat bortizkeri hutsa da bere horretan. Hori gutxi balitz bezala, gainera, delituaren kalifikazioaren ardura guztia emakumearengan jarri dute: erresistitzen ez bada, erasotzaileek egiten dutena egiten dutela ere, ez da bortxaketa. Hori muturrera eramanda, boto partikularra eman duen epailearen azalpenak erakusten du epai osoaren neurria: Justizia emakumeen kontrako arma bihurtu dute.