Etxebizitza. Funts handiak

«Ez gaituzue botako»

Azora higiezinen funtsak etxegabetu ditzakeen hirurehun familiak laguntza eskatu diote Donostiako Udalari. Kaleratzeak Stop taldearen arabera, Madrilen 3.000 familia etxerik gabe utzi dituen funtsa «negozioa dagoelako» iritsi da Donostiara
<b>Kaleratzeak Stop.</b> Azoraren kaltetuak, atzo, Donostian.
Kaleratzeak Stop. Azoraren kaltetuak, atzo, Donostian. GORKA RUBIO / FOKU Tamaina handiagoan ikusi

Xabier Martin -

2020ko otsailak 13

Ez dituzte beren etxeak utziko «borrokarik gabe». Azora funts handiak etxegabetxeko arriskuan jarri dituen Donostiako hirurehun familia ez dira besterik gabe joango etxetik, Inmobiliaria Vascongada erosi duen erraldoia horretan hasten bada. Donostiako Ijentea kalean egindako prentsaurreko batean, eusteko asmoa dutela ohartarazi zioten atzo Azorari; Donostiako Udalaren eta Azoraren egoitza hartzen duen eraikinaren artean aritu ziren, Parte Zaharrean. «Ez gaituzue botako» leloa idatzitako kartelez lagundurik esplikatu zuten egoera: Espainiako higiezinen funtsak Inmobiliaria Vascongada erosi du, eta operazio horrek hirurehun familia etxegabetzeko bidean jarri ditu.

Horixe bera gertatu baitzen 2013an Madrilen: babes ofizialeko 3.000 etxebizitza erosi, eta, alokairua baita %150 ere igoz etxeak hustu zituen Azorak. «Bartzelonan ere egiten ari da, %70 ere igota, eta orain Donostiara heldu da, negozioa hemen baitago», esan zuen Rosa Garciak, Kaleratzeak Stopeko bozeramaileak.

Jai Alai, Zabaleta, Zubiaurre, Colon, Berminghan... Hainbat kale hartzen dituzte Azoraren maizterren etxeek, gehienak hiri erdigunean eta alokairu zaharrekoak, 600 eta 900 euro artekoak; baina badira 1.600 eurokoak ere. Kopuru hori pagatzen dute Laura Fernandezek eta haren hiru pisukideek, Gros auzoan. Inmobiliaria Vascongadako beste hirurehun bizilagunen antzera, burofax bat jaso dute berriki, jakinarazteko dagoeneko ez dietela berrituko kontratua. Hileko alokairuen ordainketek, ordea, ez dute etenik izan. «Nola igoko digute gehiago alokairua? Ezinezkoa da guk gehiago pagatzea», esan zuen.

«Ziurgabetasun izugarrian bizi gara azken hilabete eta erdian», azaldu zuen Monika Zapirainek, Azoraren beste kaltetu batek; «etekin handiagoa atera nahi diote nire etxeari, pisu turistiko bilakatuz edo alokairua ehunka euro gehiago garestituz, besterik gabe. Kontua da nik hamasei urte egin ditudala jada nire etxean».

Grosen bizi den emakumearen kexua zera da, gutuna jaso zuenetik beste etxe baten bila dabilela, baina Donostian dauden prezioengatik «ezinezkoa» zaiola ezer egokirik aurkitzea. «Niretzat, merkeena da nire etxean gelditzea, baina orain dauzkadan baldintzak dira kontraturik ez dudala, batetik, eta hala ere hilero ordaintzen dudala, bestetik». Eta, hura bezala, Inmobiliaria Vascongadaren gutuna jaso duten beste maizterrak beldurrez bizi dira azken asteetan: «Eta egun batetik bestera botatzen banaute? Nik ez dut kontraturik orain. Edo 1.500 eurora igotzen badute alokairua? Ezin dut halakorik pagatu», erantsi zuen Zapirainek.

«Espekulazio hutsa da»

Kaleratzeak Stopeko kide Marcelino Garciaren ustez, gertatzen ari dena «espekulazio hutsa da». «Vascogada hutsik uzten ari zen etxebizitza asko, Azoraren iritsiera prestatzeko. Isileko etxegabetzeak egin nahi dituzte orain». Jendea etxerik gabe uzteko ekintza horiek «legezko oinarri batekin» egiten dituztela uste du, «maizterrek beren gain hartu ezin dituzten tarifa igoeren bidez». Garciak esplikatu zuen Vascongadak ez dituela berriro luzatu kontratuak, jakin bazekielako etxebizitzaren azken legearen arabera zazpi urteko epea bermatuko zitzaiela maizterrei. «Horren ordez, kontratuak eten, eta putre funts bati saldu dio enpresa».

Kaleratzeak Stopek uste du Donostia «putre funtsen helburu» bihurtu dela, udalak ez duelako neurririk hartu hori gerta ez zedin. Gogoratu zuten Benta Berriko familien auzia ere hor dagoela. Blackstone funtsak erosi ditu babes ofizialeko haien etxeak, eta haiek ere mehatxupean daude ordutik; Azoraren kaltetuen alboan egon ziren atzo Benta Berriko bizilagun batzuk. Eta Donostiako Udalari begira jarri ziren denak, bitartekari lanak egin ditzala eskatzeko, udaletxean erregistraturik geratu zen idatzi baten bidez. Baina Eusko Jaurlaritzari ere egin zizkieten hainbat eskakizun: alokairuen prezioak kontrolatzea, «putre funtsek Donostian eta Euskadin jardun ez dezaten»; etxebizitza hutsak betearaztea, zerga berezien bidez; eta etxe turistiko eta hotelen plazak ugaritzeari uztea.

Larunbatean, manifestazioa

Kaleratzeak Stopek manifestazio batera deitu du larunbaterako, Ijentea kaletik hasita, 12:00etan. Azora funtsaren egoitzaren alboan ohartarazi nahi du «Donostian zer gertatzen ari den». Inmobiliaria Vascongadak igorritako gutunen ondoren, asko izan omen dira etxea utzi duten familiak, «baina beste asko borrokatzera geratu dira», Rosa Garciak esan zuenez.

Horiek horrela, gaur-gaurkoz ez dago etxegabetzerik, kontratuak ez direla berrituko jakinarazteko burofaxak baino ez; orain gutxira arte automatikoki berritzen ziren. Finean, Azora funtsaren iritsierak «susmorik txarrenak» berretsi ditu Kaleratzeak Stop taldeko kideen artean.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Pertsona bat terraza batean eserita, Bilbon. ©Aritz Loiola / FOKU

Kasuek nabarmen egin dute gora Hegoaldean: 932 positibo

Amaia Ramirez de Okariz Kortabarria

Guztira, 12.746 PCR proba egin dira, eta egindako proba guztien %7,31k eman dute positibo. Nafarroan bi pertsona hil dira azken orduetan, eta Bizkaiko zahar etxeetan hiru egoiliar.

Osakidetzako protesta, atzo, Donostiako Amara Berriko osasun zentroaren aitzinean. ©GORKA RUBIO / FOKU

Osakidetzako «sakoneko arazoei» heltzeko eskatu dute sindikatuek

Maddi Ane Txoperena Iribarren

Protestak egin dituzte lehen arretako zentroetan. Langile gehiago eskatu dituzte, eta murrizketetan «galdutakoa berreskuratzea». Osasun Sailak dio «benetako konpromisoa» duela «sendotzeko»

Ikasgela huts bat Hernanin, artxiboko irudi batean. ©JON URBE / FOKU

Gero eta ikasle gehiago daude bakartuta ikastetxeetako kasuengatik

Uxue Rey Gorraiz

Jaurlaritzak esan du 80 ikasgela gehiago itxi dituela; ia 300 daude itxita Hegoaldean. Nafarroak laguntza emozionala emanen die ikasleei

Musukoek begiak estaltzen dituzten garai hauek

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna