Aldebiko su etena helburu

Kolonbiako Gobernuarentzat, ELN Nazioa Askatzeko Armadarekin atzo hasi zuen bake negoziazioen hirugarren bilera sailak «erronka asko» ditu. Horietako bat, ziurrenik Bogotarentzat funtsezkoena dena, zera da, ohar baten bidez herenegun azaldu zuenez: talde armatuarekin aldebiko su etena adostea. Edo, beste modu batera esanda, «atzerakorik ez duen» bake prozesu bat lortzea, atzo elkarrizketei berriz ekitear zirela Maria Jose Pizarro Rodriguez senatari eta gobernuaren ordezkariak adierazitakoaren arabera.

Ikusi gehiago: Pablo Beltran: «Lurren jabetza demokratizatzea oinarrizkoa da gatazka amaitzeko»

Badirudi hirugarren bilera sorta aurrekoak baino are garrantzitsuagoa izango dela, Kolonbiako Gobernuak apirilaren 1ean esan baitzuen elkarrizketa horiek «krisian» daudela gerrillak egun batzuk lehenago egindako erasoaren ondorioz —bederatzi militar hil zituen—. Edonola ere, Bogotak aurrera egiteko asmoa erakutsi du asteotan, eta horren beste keinu bat da atzo abiaturikoa bertan behera ez uztea.

Su etena den arren gairik garrantzitsuena, bi aldeek adosturiko agendak landu beharreko beste zenbait auzi zerrendatu ditu. Sei dira, zehazki: batetik, gizartearen parte hartzea sustatzea bakea sortzeko; bigarrenik, «bakerako demokrazia» finkatzea, gatazkaren arrazoiak identifikatuta, esaterako; hirugarrenik, «bakerako eraldaketa» egitea, pobrezia gainditzeko eta bazterketa sozialari aurre egiteko estrategiak negoziatuta, adibidez; laugarrenik, biktimen aitortzaz aritzea; bosgarrenik, gatazka armatua amaitzea; eta, seigarrenik, argitzea nola sartuko den indarrean bi aldeek adosturikoa.

Edonola ere, oraingoz, begirada eta itxaropen guztiak meniaren aferan daude jarriak. Eta aurrekaria ez da baikorra. Joan den abenduaren amaieran, Kolonbiako presidente Gustavo Petrok jakinarazi zuen «alde biko su eten bat» adostu zutela gobernuak eta ELNk, eta indarrean sartuko zela urte hasieran. Dekretu bat ere aurkeztu zuen, hori jasotzen zuena, eta azaltzen zuena menia horrek sei hilabete iraungo zuela. Gerora, ordea, gerrillak ohar baten bidez jakinarazi zuen ez zuela bat egiten su eten horrekin; hau da, esan zuen ez zutela ezer negoziatu bigarren bilera sailean.

Petro, Madrilen

Kolonbiako bake negoziazioen hirugarren bilera sorta hasi zuten unean, Petro Espainian zegoen, ostiralera arte iraungo duen bisita baterako. Lehen aldia da estatuburu gisa herrialde horretara doala, eta helburutzat izango du, besteak beste, harreman ekonomikoak sendotzea eta migrazioaren afera lantzea.

Bogotak ELNrekin dituen elkarrizketak ere hizpidera ekarriko dituzte. Moncloako iturriak Efe berri agentziari azaldu diotenez, Pedro Sanchez Espainiako Gobernuko presidenteak babesa helaraziko dio bere homologoari auzi horretan ere —prozesuan laguntzeko herrialdeetako bat da Espainia—.

Petrok, hain justu, kritikak jaso ditu Kolonbian, ez delako parte hartzen ari bake negoziazioetan.