Euskara. Hezkuntza

Ikasleek esan dute EHU dela Sarrikok hartutako erabakiaren erantzulea

Ekonomiako euskarazko ikasleei esan diete Gastu Publikoa ikasgaia gazteleraz egin beharko dutela. Hizkuntza urraketatzat jo dute

EHUko Ekonomia ikasleak, Bilboko Sarrikoko fakultatean. ARITZ LOIOLA / FOKU.
Olatz Silva Rodrigo.
Bilbo
2023ko martxoaren 24a
00:00
Entzun
Euskal Herriko Unibertsitatean Ekonomia gradua ikasten ari da Irati Muruamendiaraz, Sarrikoko fakultatean (Bilbo). Bigarren mailan dago. Joan den ostegunean, Gastu Publikoa ikasgaiko irakasleak berri bat eman zien: gaztelerazko lerroko irakasleak utzi egin zuen lanpostua eta ordezkorik ez zegoenez, asteazken honetatik aurrera euskarazko irakaslea eta bere ikasleak gaztelerazkora pasatuko zirela. Herenegun izan zen bi lerroek batera izan zuten lehenengo eskola, baina euskarazko ikasleak ez ziren joan.

Egoera ezagutu bezain laster, ikasleek idatzi bat aurkeztu zuten dekanotzan. Eta asteburuan irakasleak esan zien ebaluazio irizpideak aldatuko zituela. «Azterketak gutxiago balioko du, eta falta den edukia lan bitartez landuko dugu, bakoitzak bere hizkuntzan, gainditzen errazago izateko», azaldu du Muruamendiarazek.

Bigarren idatzi bat aurkeztea erabaki zuten asteazkenean. Nahia Agirre ere klase horretan dago, eta, azaldu duenez, euskara saileko langile batekin eta ekonomia saileko beste batekin elkartu ziren: «Esan ziguten saiatu direla gutxiengoari eragingo dion konponbidea topatzen; erabili duten argumentua da euskarazkoei gutxiago kostatuko zaigula gazteleraz ikastea, gaztelerazkoei euskaraz ikastea baino».

Etxahun Artetxe ikaskideak azaldu duenez, badakite Sarrikoko langileak irtenbiderik errazena bilatzen saiatu direla; eta EHU egin du erabaki horren erantzule: «Sarrikoko erabakia izan arren, kontuan hartu behar dugu zein baldintzarekin hartu duten erabakia: EHUn egon diren murrizketak eta irakasleen lan baldintzen okertzeak». Egoera horrek ikasle euskaldunen hizkuntza eskubideen urraketa eragin du. «EHU bere osotasunean ez da gai euskaldunduko duen hezkuntza eredua eskaintzeko: irakasleen euskara maila, unibertsitateko zenbait esparrutan euskara eskaintza falta...». Izan ere, Muruamendiarazek adierazi du hizkuntza eskubideen urraketa ez dela berria. «Euskaraz ondo hitz egiten ez zuten irakasle asko izan ditugu; eta, horregatik, eduki asko gazteleraz jaso dugu».

Ez da kasu bakarra

Lizar Oiarzun ere Ekonomia ikaslea da. Eta aste honetan ohartu da gazteleraz ikasi beharko duela 1. mailako Makroekonomia ikasgaia. Azaldu diotenez, euskarazko irakasleak eman beharreko orduak bete ditu, eta ez ditu eskola gehiagorik emango. «Klaseak gazteleraz emango ditugu orain, eta azterketa erdia euskaraz egingo dugu, eta beste erdia gazteleraz». Oiarzunek eta kideek sinadurak bildu dituzte, eta eurek ere idatzi bat aurkeztuko dute.

Agirreren arabera, arazoa da euskara eta gaztelera ez dituztela berdin tratatzen. «Nahiz eta hizkuntza biak ofizialak izan, euskarari ez diote ematen gaztelerari ematen dioten garrantzia; bigarren hizkuntza bat bezala tratatzen dute».
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.