Albistea entzun

Euskal hiztunen hazia ereiten

Arantza Jaka - Euskaraldiko ekimenen koordinatzailea Kristau Eskolan

2021eko azaroak 30

Pausoz pauso, ekimenetik ekimenera bideak urratuz eta, horrek sortzen duen arrastoan, euskal hiztunen hazia ereiten. Batzuetan, espazio zainduek duten garrantzia azpimarratuz; bestetan, esparru zabalagoak bultzatuz... Baina, beti, euskararekiko konpromisoa eta atxikimendua sustatuz geure artean eta gure sareko ikastetxeen artean.

Eta jakinik, noski, lanik handiena gutako bakoitzaren eskuetan dagoela, hizkuntza batek hiztunik ez badu, ezer gutxi baita.

Gaur ere, eskuartean erronka, aberatsa eta irekia, euskal hitza gero esparru zabalagoan mugitu eta izan dadin, hainbaten hitza elkartuz eta bateratuz esanahi handiko esaldi luzeagoak eta aberatsagoak sortu ditzan; hitzetik hortzera, loturarik gabe baina etenik gabe, aldi berean, hizkuntz koreografia berriak dantza ditzan.

Haur, nerabe, gazte eta helduon artean bultzatuz, eta batak besteari lagunduaz, euskaldunok euskaldunokin euskaraz bizitzearen garrantzia transmititzen. Esku artean paregabeko altxorra eta ondarea, egunez egun gauzatu eta janaritu beharrekoa, hezkuntz eta hizkuntz eskubideak bermatuz, hizkuntzatik ere mundu justuago bat eraikitzen joan gaitezen.

Garen garenetik, mundura zabalduta, baina erroak egoki eta sendoki sustraiturik, gure izatea eta hegan egitea gizatiarragoa eta ederragoa izan dadin. Horregatik, baita ere, lagun diezaiegun euskarazko hitzei paseatzera irteten, iparraldetik hegoaldera, ekialdetik mendebaldera.

Lehenik eta behin, erabaki indibidualak berretsi behar, kolektiboak bihurtzen joan daitezen eta bihur ditzagun. Horrela, euskararen landa haratago zabalduaz, Europako eta munduko mugak gaindituz, gure euskal kulturak hitz propioagoa eduki dezan; zer esanik badauka eta. Ozenagoa izan dadin, ezinbestekoa hezkuntzaz haratago, gizartearen konpromisoa eta inplikazioa, hezkuntzaren ahalegina bakarrik ez baita nahikoa jakitetik hiztunak izatea bihurtzeko.

Etxeko balioak eskolan lantzen eta jorratzen diren balioei gorputza ematen die, horregatik ere familiei gure gonbidapen berezia: transmisioa mimatu eta denboran luzatu, gaurtik biharrera ziurtatuz. Guztiok beharrezko; batzuk, berriz, ezinbesteko.

Euskaltzaleen Topaguneak bultzaturik, urtez urte, saioz saio, gogotsu egiten dugun ahalegina, dagoeneko, bere fruitua ematen ari da, baina mardultzen joan behar du. Berri eta sendo dezagun Europa mailan egiten den ekimen handienak (eta bakarrak) zer esanik baduela, zer adierazteko gai dela, hizkuntzaren hezkuntzak garrantzia duela, eta hizkuntza aberastea pertsona, gizartea, mundua aberastea dela.

Arnasa hartu eta jarrai parkeak, eskola kanpoaldeak, plazak, terrazak, etxeak eskalatzen, gogoz, tontorrak zain ditugu eta. Esan beharrik ez, hobe lagunekin bakarrik baino. Eta horretan ere, Haurren aurrean, helduok heldu joka dezagun.

Heldu haurrei eskutik, eta elkarrekin eta elkarturik euskarazko bideari ekin, egunerokoa bere ohizko territorioa izanez, euskarazko hitzen mendikatea zabalduaz, aldi bakoitzeko giza paisaiarekin batu dadin.

Gaur, bihar eta etzi euskara eskutik hartu, ezpainetatik hitzei leku egin eta besteei eskaini, gure hizkuntzak urteko 365 egunetan bizirik jardun eta iraun dezan.

Helduon beharra dauka euskarak, haurrengana ondare baliagarri bezala hel dadin. Oinarrietatik ezagutzara berretsi dezagun. Gizartearentzat hizkuntza ere mesede baita.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.