Albistea entzun

Arrauna

Bete-beteko asteburua

Urdaibaik Hondarribiko eta Getariako banderak irabazi ditu. Erregularra izan nahi du 'Bou Bizkaia'-k, sailkapeneko lehen postuan sendotzeko.
<b>Urdaibaiko trainerua, Getarian irabazi ondoren.</b>
Urdaibaiko trainerua, Getarian irabazi ondoren. IDOIA ZABALETA / FOKU Tamaina handiagoan ikusi

Pettan Uralde -

2022ko abuztuak 9

Zaila da Urdaibaik izan duen asteburua baino hoberik izatea. Hondarribiari etxean festa zapuztu zion larunbatean; eta, igandean, Getariako uretan, Ama Guadalupekoa-ren huts handi bat aprobetxatu zuen sailkapen nagusia iraultzeko. Bermeoko ontzia ligako lehen postuan dago orain, Donostiarrarekin batera. Nahierako asteburua izan da Bou Bizkaia-rentzat. Orain, arraunkada aproposa aurkitu behar dute, eta sasoi onari eutsi, Eusko Label liga berriz irabazi ahal izateko. 2018an irabazi zuen azkenengoz.

Urdaibaik apustu handia egin du sasoi honetarako, azken denboraldietako bolada txarrari amaiera emateko asmoz. Entrenatzaile berria, patroi berria eta sei arraunlari fitxatu zituen udazkenean. Hala ere, bandera gutxi zeuzkan irabazita orain arte. Coruñako banderan eta Euskadiko Txapelketan baino ez zen gailendu. Alabaina, baliteke azkenengo asteburu biribila mugarri izatea. Ikusteko dago, hala ere, errepikatu dezaketen horrelakorik aurrerantzean.

Alain Kolungak (Barakaldo, Bizkaia, 1987) urte mordoa daramatza Bizkaiko taldearekin, eta oso argi dauka Bou Bizkaia potentzial handiko trainerua dela. Haren ustez, erregulartasuna lortzea da orain arte gehien kostatu zaiena: «Garaipenek lagundu egiten gaituzte horretan. Gustura gaude izaten ari garen bilakaera horrekin. Badirudi orain lortzen ari garela erregulartasun hori. Ikusita Hondarribiak zer abantaila zuen, beharrezkoa genuen horrelako asteburu bat izatea».

Aldaketara egokitzen

Ez da makala izan Iker Zabala entrenatzailearen eta Gorka Aranberri patroiaren eskutik Urdaibaik egindako apustua. Kolungaren ustez, Zabalak «grina» itzuli die arraunlariei: «Ikerrek berriro piztu digu denboraldi on bat osatzeko behar dugun konfiantza». Aranberrik eman dienaz ere mintzatu da segidan: «Patroi on batek asko ematen dizu, eta Gorka, nire ustez, ligako onenetakoa da. Arraunlarioi sekulako segurtasuna ematen digu». Hala ere, onenak taldean izateak ez ditu beti emaitzarik onenak bermatzen. Orain arteko «zailena» aldaketara egokitzea izan da, Kolungarentzat: «Kostatu zaigu martxa hartzea, baina dena irabazteko lehian gaude oraindik. Gainera, potentzial handia dugu: batetik, esperientzia handiko arraunlariak ditugu; bestetik, harrobiko gazteak ditugu, eta, gainera, entrenatzaile eta patroi onak».

Bi garaipen asteburu batean. Gutxik pentsatuko dute hobeto egin daitekeenik, baina Bermeoko arraunlariak argi dauka gehiago egin dezaketela: «Gure planteamendua berbera da. Ez gara konformatzen, eta arriskuak hartuko ditugu, hobetzeko. Maila ona daukagu, baina gehiago eman dezakegu».

Sailkapen nagusiko lehen postuan daude, Donostiarrarekin batera, 128 punturekin. Hondarribia hiru puntura daukate orain. Zaila da jakitea nork amaituko duen lehen postuan, baina txapeldun izateko behar dena dauka Bou Bizkaia-k: «Bilakaera honi heldu behar diogu, irabazten segitzeko».

Denborak erakutsiko du Bermeoko taldea zein postutan egongo den denboraldi amaieran. Nolanahi ere, zertarako gai diren erakutsi dute bizkaitarrek asteburu honetan , eta badakite zein den egin beharreko bidea: «Liga eta Kontxako Bandera irabazi nahi baditugu, badakigu zer egin. Hala ere, urrun daude Kontxa eta liga amaiera. Oraingoz, nahiago dut asterokoari erreparatu».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Kirolaririk osoena izateko lehian

Julen Etxeberria

Banakako Euskal Pentatloiaren finalak jokatuko dituzte gaur, Azpeitiko zezen plazan (22:00, ETB1). Emakumezkoetan, Zelai III.a, Orbe eta Arruti ariko dira; gizonezkoetan, berriz, Izeta VI.a, Zaldua, Gabirondo, Atutxa II.a, Zelai IV.a eta Otaegi. Iaz, Zelai III.ak eta Izeta VI.ak irabazi zuten.

 ©GORKA RUBIO / FOKU

«Lehen lau taldeen artean egon nahi dugu»

Zuriñe Iglesias Sarasola

Gaur hasiko du denboraldia Txuri Urdinen gizonezkoen taldeak. Alain Iturraldek argi du entrenamenduak direla «jokoaren isla». Azpimarratu du jokalariek hobetzen jarraitu behar dutela.
 ©LEONARDO MUÑOZ / EFE

«Lasai erabaki dut erretiroa hartzea, bakean»

Ainara Arratibel Gascon

Kirolariek gehiago nahi izaten duten arren, egindako ibilbidearekin «gustura» dagoela utzi du tenisa Arruabarrenak. Arantza bakarra geratu zaio: Grand Slam batean aurrerago iritsi ez izana.
Iera Agirre Iturriaga, pilota jotzear, Adosen binakakoaren finalean. ©A. C. / FOKU

Udako lanari txapela jartzera

Julen Etxeberria

Plazaz Plaza torneoko finala jokatuko dute bihar Etxaurin. Barrocal-Mendiburu eta Aldaregia-Iturriaga ariko dira elkarren aurka

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Pettan Uralde

Informazio osagarria

Iruzkinak kargatzen...