Joe Satriani, gitarrak eta gitarristak lagun

Garai batean superbanda izendatzen ziren horietakotzat har liteke G3. Ez alferrik Joe Satriani gitarrista ezagunak osatu du bere inguruan, eta musika tresna berarekin abilak diren beste bi lagun gonbidatu ditu, biak ala biak rock progresiboan eta metalean aldez edo moldez nabarmendu direnak. Batetik, John Pretucci, Dream Theatre metal progresiboko taldeko kidea; eta, bestetik, Uli Jon Roth, 1973. eta 1978. urteen artean Scorpions taldeko gitarrista izan eta gerora rock progresiboari lotutako beste proiektu batzuk garatu dituena (Electric Sun).

Orain, hiru gitarristak, hirurak beren tresnaren birtuosoak, elkarrekin ari dira zuzenean, eta Bilbon Satrianiren azkeneko diskoa aurkeztuko dute: What Happens Next. Lan instrumental horretan Glenn Hughes (baxua) eta Chad Smith (bateria) izan ditu lagun Satrianik.