Albistea entzun

Kataluniako hauteskundeak. ANALISIA

Azterketa eguna

Martxelo Otamendi -

2017ko abenduak 21

Baxoa egin behar duen ikaslearen urduritasunarekin sumatzen dira alderdietako arduradunak kanpainaren azken egunotan. Iritsi da, luzea egin da itxaronaldia, baxoaren eguna; izan ere, gaur lehiatuko diren bi blokeek asko daukate jokoan azterketa horretan, baina dezente gehiago daukate jokoan independentziazaleek unionistek baino.

Independentziazaleek galtzen badute 68 eserlekuek ematen duten gehiengora iristen ez badira— ez dute edukiko beste tresnarik porrota zuzentzeko. Aitzitik, unionistek galtzen badute, estatu bat daukate atzean nahiko indar, tresna, eta lotsa demokratiko gutxirekin gehiengo independentziazaleari hegalak moztu eta mugitzen ez uzteko, Europak eragozten ez dion bitartean. Haurlauza hori antzematen da independentziazaleen kanpainaren diskurtso, elkarrizketa eta eztabaidetan. Jakitun dira, irabazita ere, oso tarte estua daukatela orain arte baino gehiago egiteko, edo, beste modu batean esanda, aldebakarreko prozesuarekin aurrera segitzeko.

Espainiako presidente Mariano Rajoyk Espainiako Konstituzioaren 155. artikulua indarrean jarri eta, ondorioz, Kataluniako Gobernua eta Parlamentua bertan behera utzi zituenean, Espainiako analista askok ez zuten begi onez ikusi hauteskundeetara horren azkar deitzea, urriaren 1eko argazkien likidoa eta zaurien odola oraindik lehortu gabe zeudelakoan. Zanpaketa haren ondotik kartzelatzeak eta deserria etorri zirenez, azken horiek izan dira independentziazaleen kanpainen ardatz; eta ez, intentsitate berarekin, erreferendumaren eguneko irudiak.

Giroa asko txartu da asteotan Junts Per Catalunya eta ERCren artean, eta hauteskunde hauetan zerrenda bakarrean ez joateak muga bat markatuko du orain arte ikusi ditugun ekitaldi bateratu eta argazki jendetsuetan. Dibortzio horren hurrengo kapituluaren gidoia idatzi gabe dago oraindik, baina gidoi horren lehen idazkerak diosku Junqueras Puigdemonten aurretik geratzen bada asko korapilatuko dela trama.

Giro txar horren adierazleetako bat izan da JPC eta ERCren mitinetan apenas izan dela aipamenik beste errepresaliatuekiko. Junts Per Catalunyako mitinetan ez dituzte aipatu, salbuespen batzuk kenduta, ERCko Junqueras eta besteak; beste horrenbeste gertatu da ERCren mitinetan Puigdemontekin. CUPekoek askoz jarrera solidarioagoa eduki dute denekin. Zuzendaritzen arteko giro txar hori iritsi da alderdietako oinarrietara, eta, kezkagarriago dena, alderdiekin lotura zuzena eduki gabe prozesuari ilusio guztiarekin bultza egiten jardun duten herritar asko —alderdikide direnekin alderatuta askoz ere gehiago direnak— ezin sinisturik daude ikusten ari diren harreman haustura hori.

Iraganean bezala, etorkizunean ere Kataluniako independentziaren prozesuak beharko du herri enfermeria sozialaren zainketaren beharra, asteotako zauriak sendatzeko. Ez dezagun ahaztu Rajoy ez dagoela kezkatuta Kataluniako PPk gaur ere pairatuko duen porrotarekin, bere kezka nagusia prozesuari babes soziala kentzea da, eta horretarako beharrezkoa zaio independentziazaleen arteko giro txarra. Irribarretsu begiratzen dio zatiketa horri Espainiako presidenteak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Israelgo eta AB Ameriketako Estatu Batuetako armadek ariketa militarrak egin zituzten, atzo. ©EFE

Israelek eta Palestinako miliziek elkarri eraso egin diote, Jeningo hilketen ostean

Mikel Elkoroberezibar Beloki

Gazatik bost suziri jaurti dituzte Israelera, eta Israelek Gaza bonbardatu du. Ez da hildakorik izan.

Ehorzketa etxe bateko bi langile droga trafikatzailea zelakoan hil zuten pertsona baten gorpua eramaten, Manilan, 2021eko irailean ©ROLEX DELA PENA / EFE

NZAk berriz ireki du Filipinetako drogaren kontrako gerrari buruzko ikerketa

Ander Perez Zala

Auzitegiak fiskaltzaren eskaria onartu du, argudiatuta Manilak harturiko erabakiak ez direla nahikoa izan. Duterteren agintaldian 30.000 lagun hil zituzten, giza eskubideen aldeko erakundeen arabera.

 ©Paolo Aguilar/ EFE

Dina Boluarteren aurkako zentsura mozioa aurkeztu dute

Berria

Peruko Kongresuko zenbait kideren arabera, presidentea «ez da gai» kargu horretan jarduteko

Herritar batzuk gizon baten hilotza eramaten, atzo, Jeninen. ©ALAA BADARNEH / EFE

Israelgo indarrek gutxienez hamar palestinar erail dituzte bi erasotan, tiroz

Julen Otaegi Leonet - Mikel O. Iribar

Jenin hirian eta Jerusalem ekialdean oldartu dira militarrak. Armadako buruak «terrorismoaren kontrako jarduerekin» jarraitzeko agindu du

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...