Seaskako eskoletan behar bereziak dituzten haurrei laguntzeko kanpaina abian

Frantziako Gobernuak ez du bere gain hartzen Seaskako eskoletan behar bereziak dituzten haurrak jangeletan laguntzeko lana, eskola pribatua dela argudiatuta. Behar horiei erantzuteko, gurasoek osatutako Integrazio Batzordeak kanpaina bat aurkeztu du, haur horien inklusioa sustatzea helburu. Martxoaren 25ean hasiko dutediruztatze kanpaina,Inklusioak ez du etenik izenburupean. 116.000 euro lortzea dute helburu.

Prentsaurreko baten bidez azaldu dutenez, kanpainaren izena ez dute nolanahi aukeratu: Frantziako Hezkuntza Ministerioak behar bereziak dituzten haurren bazkal denborako laguntzak ez ditu diruztatzen iaztik. Horrek ikastolako «haurrekiko injustizia» sortzen duela eta gurasoen «prekaritate egoera areagotzen» duela salatu du Peio Jorajuria ikastolen lehendakariak.

Datorren ikasturteko beharrei erantzuteko 116.000 euro bildu behar ditu Integrazio Batzordeak. «Urtero bezala, hainbat ekitaldi egingo ditugu gure partaideekin, Partaide egunarekin hasiz», azaldu du Christelle Minaberri Integrazio Batzordeko lehendakariak.

Lau langile

Gaur-gaurkoz, 158 haur ditu elkarteak inklusio programaren barruan, eta lau laguntzaile berezitu ditu kontratupean. «Guk lau laguntzaile berezitu proposatu behar izateak erran nahi du hainbat haurrek ez dutela Frantziako Hezkuntza Ministerioaren erantzun egokirik jaso», erantzun du Jorajuriak, eta gehitu du: «Guretako haur bakar bat ezin da laguntzarik gabe utzi». Bigarren ikasturtea izango da jangelako arazo hori dutela. Frantziako Hezkuntza Ministerioak iazko irailean iragarri zuen ez zituela gehiago bere gain hartuko laguntzaile berezituen lanpostuak bazkalorduan. Tokiko erakundeei utzi die ordu horien diruztatzeko ardura.

Eskola pribatuek bakarrik jasaten dute neurri berriaren eragina, herriko etxeek eskola pribatuei ematen ahal dieten diru kopurua mugatua baita. Neurri horrek haur horien integrazioan eragiten du. «Laguntzailerik ez badu, haur horrek ezin du jangelan jan, eta ezin badu jangelan jan, egia erran, kasu gehienetan ezin da eskolara joan; beharrezkoa den zerbitzu bat da», laburbildu du Jorajuriak.

Ipar Euskal Herrian, Seaskako eta ikastetxe katolikoetako 30 ikaslek beharko lukete laguntza jangeletan.