Albistea entzun

ZUZENDARIEN GALEUSCA

Independentziazalea eta etsaia

Martxelo Otamendi - BERRIAko zuzendaria

2022ko maiatzak 1

Izan liteke Espainian alderdi bat independentziazalea Kataluniakoa, Galiziakoa, Euskal Herrikoa, Kanaria uharteetakoa... etsaia izan gabe, edo bereizi nahi duelako egon behar du beti susmopean, alegia, zerbitzu sekretuek zelatatutako etsaien artean?

Espainiako zerbitzu sekretuen jarduna, hau da, CNIrena, arautzen duen legeak argi uzten du zein den bere egiteko nagusietako bat: «Espainiaren lurralde batasunaren aurkako edozein mehatxu aurreikusi eta saihestea». Definizioz, alderdi independentziazaleen jarduna arrakastatsua bada, hautsi egingo da edozein estaturen batasuna. Horrela gertatu zen Jugoslavian Esloveniarekin, Kroaziarekin... eta antzekoa jazoko zatekeen 1995ean Kanadan Quebecekin eta 2014an Erresuma Batuan Eskoziarekin, bi kasu horietan egindako erreferendumetan independentziazaleek irabazi balute.

Pegasus espioitza programaren erabilera justifikatu du asteon Espainiako Defentsa ministro Margarita Roblesek: «Zer egin behar du gobernu batek norbaitek konstituzioa urratzen duenean? Norbaitek independentzia deklaratzen duenean?». Beraz, gezurra da helburu politiko guztiak lor daitezkeela indarkeria erabili gabe egiten bada. Bagenekien, baina eskertzekoa da argi adieraztea.

Baina badaude galdera gehiago auzi honetan. Esate baterako, zer egin behar du sistema politiko arduratsu batean zerbitzu sekretuen arduradun politikoak, baldin eta zerbitzu horiek alderdi politikoak zelatatzen harrapatzen badituzte? Arduradun politiko horrek jakin edo ez zertan aritu diren bere mendekoak. Are gehiago baldin bazekien, baina, ez jakinda ere, zerbitzu sekretuek egiten duten guztiaren arduradun politikoa Robles baita. Zer edo zertarako asmatu zuten legelariek in vigilando espresioa. Hau da, ministroaren ardura da bere mendekoak kontrolatzaileak kontrolatzea.

Estatu politiketan gertatzen denez, kasu honetan ere Alderdi Popularrak ez dio gatzik botako Pedro Sanchez presidentearen zauriari. Bi alderdiek daukate zer ezkutatua.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...