Errekorra hautsi du izurriak Hegoaldean: ia 9.000 positibo

Transmisioaren hazkundeak ez du etenik Hego Euskal Herrian. Oraingo honetan, gainera, lehen olatuaz geroztik ezarritako langa guztiak gainditu ditu izurriak: 8.987 positibo atzeman zituzten Osakidetzak eta Osasunbideak herenegun. Osasunbideak ez du transmisioari buruzko oharrik argitaratu —astean bitan plazaratzen dute—, baina Eusko Jaurlaritzako Osasun sailburu Gotzone Sagarduik datu batzuk eman ditu hedabideen aurrean. Hamalau eguneko intzidentzia metatuak ere gora egin du, eta 100.000 biztanleko 2.285 kasukoa da. Nafarroakoa are makurragoa da: 2.435 kasu.

Nafarroako Gobernuak emaniko datuen arabera, gainera, positibo tasa harrotuta dabil: astelehenean, 7.386 proba diagnostiko egin zituzten, eta 2.419k eman zuten positibo: %32,75ek. Proba egin zieten herritar guztien herenek birusa zuten. Ospitaleetako egoerari dagokionez, orain 607 pertsona daude ospitaleratuta Araba, Bizkai, Gipuzkoa eta Nafarroan: horietatik 473 gela arruntetan daude, eta 134, berriz, ZIU zainketa intentsiboetako unitateetan, larri. Nafarroan COVID-19ak jota beste lau pertsona hil direla jakinarazi du gobernuak. Azken hamabi egunetan hogei lagun hil dira herrialdean izurriaren ondorioz.