Albistea entzun

EPPUR SI MUOVE

Segurantzako landetara itzuliz

Ariel Escalanteren <em>Domingo y la niebla</em> filmeko irudi bat.
Ariel Escalanteren Domingo y la niebla filmeko irudi bat. INCENDIO CINE Tamaina handiagoan ikusi

Begoña del Teso -

2022ko irailak 30

Hegoaldean bukatu zaigu festa. Festa eta erronka. Festa, eta irudi ehiztari moduan ibiltzeko beharra. Festa, eta plaza guztietan gustuko izan ditugun filmak laudatzeko tentazioa, eta gustuko izan ez ditugun horiek gupidagabe zapuzteko gogo lizun ederra.

Bukatu zaigu festa Hegoaldean. Ez, ordea, Iparraldean. Hor duzue galant demonio Miarritzen Latinoamerikako zinema eta kulturari eskainitako jaialdia, non batukadak bat egiten duen Donostiatik pasatu diren hainbat eta hainbat filmekin. Non Como polvo en el viento idatzi zuen Leonardo Padura argentinarra eta Patricia Melo brasildarra (O matador eta Fogo-fatúo nobelen autorea) biltzen diren, espainolez, portugesez eta beste hamaika hizkuntza eternalez mintzatzen den kontinente haren intrigazko literatura iluna hizpide.

Akabo festa Hegoaldean. Gora Iparraldekoaren azken txinpartak. Gaur bertan ikusgai, Zinemaldiaren Horizontes Latinos sailean dastaturiko eta eztabaidaturiko hainbat zinema puska balent. Esaterako, Nikaraguako Laura Baumeisteren La hija de todas las rabias. Churecan, herrialdeko zabortegirik handienean geratuak gara pelikula honetako pertsonaiekin, Lilibeth eta Mariarekin. Ama eta alaba dira, eta bai zinematografikoki, bai gizakiak bezala, franko dute komunean Ben Zeitlinen Beasts of the Southern Wild mirari hartako biztanleekin. Baumeisterren filmean errealismo magikoa ozpindu egiten da. Adi hainbatetan Celine Sciammarekin kolaboratu izan duen Para Onek sortutako soinu bandari.

Biharko programazioan, Donostiatik pasatu ez den lan ikaragarria, Cannes osoa ustekabez hartu eta dardara gozo krudelean utzi zuen Costa Ricako Ariel Escalanteren Domingo y la niebla. Honetan ere, errealismo magikoak bildutako izu istorio batean, hainbat salaketa gogor eta hainbat omenaldi benetako ikusten ditugu.

Bueltarik ez da, akabo zen festa Hegoaldean, Donostiako Beldurrezko Astea eta Bilboko Zinebi bilkura ezinbestekoak noiz hasiko espero desesperatuan.

Bueltarik bada... Iparraldean, non beti izango ditugun zelatan eta erne Gastibeltzako eta Kanaldudeko lagunak (txalo zaparradaz hartu zituen izen biak, ekimen biak, borroka biak Black Is Beltza II: Ainhoa ikustearren Donostiako belodromora arrimatu zen jendetzak).

Izango dira bihar Miarritzen DJak eta Kubako saltsa dantzan hasteko ikastaro trinko-trinkoa. Donostiako Zinemaldian andre, jaun eta beti jabe izan ziren ikusleek saritutako filmarekin bukatuko da festa Iparraldean ere: memoria historikoa zertan den eta datzan ederki dakien herri batetik etorri zitzaigun gurera Santiago Mitreren Argentina, 1985 hori, eta jendeak saritu egin zuen.

Eutsi ba goiari Lapurdi aldean, eta bitez kasik zorionekoak Hegoaldekoak, hamar egunez irudizko landa ezezagun eta irristakorretan arrisku deliziosoan ibili ondoren itzuli baikara segurantza osoko eremuetara. Gustura asko, izan ere. Bai, ez dugu ahaztuko, etsenplurako, Mikele Landa Eigurenek Noizko basoa berean landutako irudi analogikoen eta soinu digitalaren nahasketa arras interesgarria. Ezta Villabona-Amasako Nagore Muriel Letamendiak Erro bi horretan aurrera eramandako istorio-metafora hura ere, Adrian Nogales argazki zuzendariarekin batera ederki sortutako zinema koloratura batean oinarritua. Akatsak ikusi zizkion bere lanari Nagorek pantaila handi-handian proiektatu zenean. Normala, oso, baina bai Mikele, bai Nagore euskal zinemaren esperantza ugarietako bi dira.

Akabo festa Hegoan eta akabatzear kontinentean. Lasai izan, piztu dira dagoeneko areto korrientetako argiak. Bertan, betiko lagunak: gure odol freskoa nahi duten banpiroak (The Invitation) eta Hogwarts ikastetxearen sukurtsal Alemaniakoa den lizeo bateko animalia magikoak. Biek merezi dute. Labordeta musikari eta borrokalariari eskainitako dokumentalak horrenbeste.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Bertsolari Txapelketa Nagusiko finalaurrekoa, 2 itzulia: Bilbo

Bilbon erabakiko da zein zazpi bertsolari sailkatuko diren finalerako

Olatz Enzunza

Zazpigarren eta azken finalaurrekoa jokatuko da gaur Bilbon. Aitor Mendiluze Gonzalez, Amets Arzallus Antia, Joanes Illarregi Marzol, Jone Uria Albizuri, Maddalen Arzallus Antia, eta Saioa Alkaiza Guallar arituko dira kantuan. Idoia Anzorandia Kareaga izango dute gai jartzaile.
 

Aitor Mendiluze eta Amets Arzallus, atzo, elkarrekin kantuan, hamarreko txikiko ariketan. ©MARISOL RAMIREZ / FOKU

Ez da ate ondoan geratu

Miren Mujika Telleria

Amets Arzallusek Bilbon irabazi ondoren, erabakita gelditu da finala. Harekin batera ariko dira Illarregi, Ibarzabal, Gaztelumendi, Colina, Mendiluze, Martin eta Lujanbio
 ©ARITZ LOIOLA / FOKU

«Beharbada gu ere iraultza bat bizitzen ari gara»

Itziar Ugarte Irizar

Etorkizun hurbilean, Parisen, hiria errefuxiatu klimatikoz beteta dagoenean eta ia jende guztiak errealitate birtualerako betaurrekoak aldean daramatzan inguru batean girotu du idazleak 'Berriz zentauro' eleberria. Agertokiak agertoki, baina, adin ertaineko emakume baten galderak ikusten ditu ardatzean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.