Albistea entzun

ATZEKOZ AURRERA

Sagardoaren zalerik finenak

Giro ederra izan da Euskal Jaiei lotuta egiten den Donostiako Sagardo Egunean. Konstituzio plaza jendez bete da, 32 sagardotegiren sagardoa edateko. Sagarrondoak zaindu eta lantzen dituztenak omendu dituzte aurten.
Sagardogileak, mahaira bildutako sagardozaleei zerbitzatzen.
Sagardogileak, mahaira bildutako sagardozaleei zerbitzatzen. ESTITXU ZABALA / IRUTXULOKO HITZA

Ainara Arratibel Gascon -

2014ko irailak 7 - Donostia

Sagardo Eguna baino gehiago, merkealdiaren hasiera dirudi honek». Umorezko alderaketa horrekin deskribatu zuen Gipuzkoako Sagardogileen Elkarteko lehendakari Arantxa Eguzkitzak, atzo, 10:45 inguruan, Donostiako Konstituzio plazan zegoen giroa. Ez zitzaion arrazoirik falta. Hondartzarako edo mendirako egun aproposa izan arren, dastatzea hasi baino ordu laurden lehenago, sagardozale fidelenak ilara egiten ari ziren edalontzia erosteko. Aurtengo Sagardo Egunak, gainera, sagardozaleak eta sagardogileak ez ezik, sagastiak lantzen eta zaintzen dituzten baserritarrak bildu ditu. Guztiek batera, festa giroan, sagardoaren kulturari bultzada bat eman nahi izan zioten, 29. urtez.

Dastatzea hasi aurretiko irudi horrek hunkitu egin zuela onartu zuen Eguzkitzak. «Honek erakusten du zein esker onekoak diren sagardozaleak. Ez dute huts egiten. Euria egin duen urteetan ere beti bildu izan da jende dezente. Gure herriarentzat eta kulturarentzat edari bat baino gehiago da sagardoa». Euskal Jaiei dago lotuta eguna, eta halakoen garrantzia nabarmendu zuen. «Nire aita izan zen sustatzaileetako bat, argi ikusi baitzuten sagardoak zabalkunde bat behar zuela, eta horretan jarraitzen dugu». Atzokoan iazko sagardoa dastatu ahal izan zuten bertaratu zirenek, baina sagardogileak ez daude geldirik, eta hemendik gutxira hasiko dira urtarriletik aurrera sagardotegietan dastatu ahal izango den sagardoa egiten. Eguzkitza baikor azaldu zen. «Aurten, iaz baino hemengo sagar gehiago egongo da, eta hori beti da garrantzitsua».

Edalontziak bete eta bete ari zen Astigarragako (Gipuzkoa) Rezola sagardotegiko Jose Ramon Rezola. «200 botila inguru ekarri ditugu, eta, erritmo honetan jarraituta, ez dakigu ordubietara iritsi ahal izango garen». Jendea gustura zegoela zioen. «Iazko sagardoa oso ona izan zen, eta hori nabari da».

Hala baieztatu zuen Irungo (Gipuzkoa) Juan Manuel Nuñezek. «Asko gustatzen zaigu sagardoa, bai botilan zein txotxean. Gure gastronomiaren ikurretako bat da, eta bultzatu egin behar dugu». Sagardoa probatu, eta harridura aurpegia jarri zuen Huelvako (Espainia) Carmen Sanchezek. «Familiarekin egun batzuk ari gara pasatzen Donostian, eta ezustean harrapatu gaitu honek. Asturiasko sagardoa probatua nuen, eta antzekoa izango zela pentsatzen nuen. Baina hau ez da horren gozoa, eta, freskoa dagoenez, ederki sartzen da». Txorizo ogitartekoa ere eskuetan zuen. «Gure asmoa gero pintxoak jatera joatea zen. Baina biharko utziko dugu».

Sagastien zaindariei, ohore

Goizak aurrera egin ahala, sagardo usaina nabari zen txoko guztietan. Ogitartekoak eta pintxoak prestatzen ari zirenak ere geratu gabe ari ziren. 12:30ean iritsi zen Sagardo Eguneko une garrantzitsuenetako bat. Gipuzkoako Sagardogileen Elkarteak urteroko omenaldia egin zien, sagardoari lotutako erakundeei eta pertsonei. Aurtengoan, sagastiak lantzen dituzten nekazariak omendu zituzten. Haien izenean, oroigarria jaso zuen Fruitel elkarteko Antton Mendiak. «Egun handia da gaurkoa guretzat. Sagardogileekin elkarlanean jarraitzeko eta gure sagastien kalitatea hobetzeko konpromisoak tinko jarraitzen du».

Atzokoan, dena den, euskal giroa ez zegoen bakarrik Konstituzio plazan. Loiola kalean, adibidez, kantu kalejira egiten ari ziren. Egunkaria itxi zutenean sortutako ekinbideak gero eta tradizio handiagoa du hirian, eta atzo ere jende ugari batu zen abestera. Aberriaren Mugak, Herribehera, Bagare... Errepertorio mardula osatu zuten. Osteratxoa egiten ari ziren asko, ezin eutsita, batu egiten ziren kantura. Hala gertatu zitzaion Miren Aldalurri. «Oso abesti ederrak dira, betikoak».

Herri kirolek, larrain dantzak, bertso saioak, eta erromeriak osatu zuten atzoko egitaraua. Gaur festak Parte Zaharrean jarraituko du, Kontxako Banderaren lehen jardunaldiari lotuta.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Manel Vidal, astearteko saioan ©Berria

TV3ek Manel Vidal umorista kaleratu du, PSC svastika batekin lotzeagatik

Urtzi Urkizu

TV3eko zuzendariak Zona Franca saioa egiten duen ekoiztetxearekin batera hartu du erabakia. TV3eko Programetako Kontseilu Profesionalak kaleratzea salatu du, eta aurrekari bat sortu dela kritikatu.

Ylenia Baglietto eta Lander Otaola aktoreak, goizean, Bilboko udaletxean ©Bilboko Udala

Ylenia Baglietto eta Lander Otaola aktoreak izango dira Farolin eta Zaranbolas Bilboko aratusteetan

Amaia Igartua Aristondo

Besteak beste, ETB1eko 'Goenkale' telesailean egin zuen lan Bagliettok, eta 'Vaya Semanita'-n Otaolak. Inauteriak otsailaren 17an hasiko dira, pertsonaion atxiloketarekin eta epaiketarekin, eta 21ean bukatu.

 ©JAIZKI FONTANEDA / FOKU

«Nire lanbidea artearekin lotzen saiatzen nintzen beti»

Unai Etxenausia

Armestok biltegian gordeta zeuzkan lan batzuk aurkeztu ditu Gasteizko Zas Kultur Espazioan. Marrazkiek «pertsonen arteko komunikazioa eta inkomunikazioa» erakusten dute.
 ©ETB

«Beste gauza batzuk probatu nahi ditut»

Urtzi Urkizu

Igandean, Gurrutxagaren agurra izango da ETB1eko 'Herri txiki, Amerika handi' saioan. Zortzi denboraldiren ondoren, beste aurkezle bat arituko da 'Herri txiki, infernu handi'-n.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...