Albistea entzun

«Sarraski isila» gelditzeko deia

Martxoak 3 elkarteak «prekaritateak hildako langileak» gogoratu ditu Gasteizko sarraskiaren 44. urteurrenean. Zalantzak ditu Martin Villak Servini epailearen aurrean deklaratuko ote duen
Milaka pertsona bildu ziren Gasteizko kaleetan, Martxoaren 3ko manifestazioan.
Milaka pertsona bildu ziren Gasteizko kaleetan, Martxoaren 3ko manifestazioan. JAIZKI FONTANEDA / FOKU Tamaina handiagoan ikusi

Igor Susaeta -

2020ko martxoak 4

Martxoak 3 elkartekoen ustez, Francisco Aznarren, Romualdo Barrosoren, Pedro Maria Ocioren, Jose Castilloren eta Bienvenido Peredaren memoriak «oraina» elikatzen du. Atzo bete ziren 44 urte Espainiako Poliziak Gasteizen hil zituenetik, San Frantzisko elizan egiten ari ziren batzar batean zeuden langileei oldartuta. Eta langileen oraina oso presente dauka elkarteak, atzo, sarraskiaren urteurrenean, elizaren kanpoaldean egindako omenaldian, «lan istripuetan eta prekaritatearen ondorioz bizitza galdu duten langileak» izan baitzituen gogoan —Zaldibarko luizian desagertutakoak zenbatu gabe, LABen arabera aurten hamalau pertsona hil dira lan istripuetan Euskal Herrian—. «Sarraski isil hori gelditu beharra dago», nabarmendu zuten elkartekoek, eta «justizia» eskatu. Omenaldiaren ondoren sindikatuek deituta egindako manifestazioak Gasteizko kaleak bete zituen.

Eta atzera begiratzeari utzi gabe, aurrera begira jarri dira. Frankismo garaian egindako krimenengatik Argentinan jarritako kereilaren barruan, Rodolfo Martin Villa 1976ko martxoan Harreman Sindikalen Espainiako ministroa zena auzipetu gisa galdekatzekoa da Maria Servini epailea, datorren martxoaren 20an, Argentinak Espainian duen enbaxadan, Madrilen. Baina Martxoak 3 elkartekoak ez daude ziur azkenean galdekatuko duenik. Joan den abenduaren 10ean zen deklaratzekoa, baina martxoaren 20ra atzeratu zuten zitazioa. «Azken orduko maniobrek errailetik atera dezakete egoera hau, eta, egun gutxiren faltan, pairatzen ari garen babesik eza eta ziurgabetasuna jasanezinak dira». Elkartekoen esanetan, «estatu kontu bat» da inpunitatea. «Eta ez dakigu ez duten harekin hautsi nahi, edo ezin duten, edo ez diren ausartzen».

Bestalde, «herritarrengandik» beti sentitutako babesa eskertu zuten Nerea Barroso eta Eva Martinez elkarteko kideek. Gaineratu zuten, ordea, erakundeen jarreraz gauza bera ezin dutela esan. Izan ere, Memoria Gara elkartearekin batera eskatu zuten, 2018ko abenduan, San Frantzisko eliza, «sarraskiaren agertokia», memoria eta giza eskubideen zentro bilakatzeko. Martxoak 3 elkartekoen esanetan, Gasteizko Udalak, Arabako Diputazioak, Eusko Jaurlaritzak eta Gogora institutuak bat egiten dute eskaera horrekin, baina ez dira igaro «hitzetatik ekintzetara».

Iluntzeko ekitaldien aurretik, eguerdian, alderdi politikoetako ordezkariak joan ziren San Frantzisko elizaren kanpoaldean hildakoen omenez dagoen monolitora. Maddalen Iriarte EH Bilduren lehendakarigaiak salatu zuen Espainiako Gobernua «trabak» jartzen ari dela Martin Villak Serviniren aurrean deklaratu dezan. Iriarterentzat, gainera, biktimek ez dute jaso «aitortzarik». EAJren Arabako presidente Jose Antonio Susok «egia, justizia eta erreparazioa» exijitu zituen.

Eskaera Nafarroan

78 Sanferminak Gogoan plataforma ere Argentinako kereilara batu zen iaz —1978ko uztailaren 8an Espainiako Poliziak German Rodriguez hil zuen tiroz, Iruñean—, eta atzo agerraldia egin zuen Nafarroako Parlamentuan. Plataformako kideek eskatu zioten Nafarroako Gobernuari Madrili esateko beharrezko neurriak har ditzala Martin Villak deklaratu dezan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jatetxe bateko zerbitzaria, atzo, Donostian, bi bezeroren COVID ziurtagiriak egiaztatzen. ©JON URBE / FOKU

Ostalariek ez dute polizia (ere) izan nahi

Maddi Ane Txoperena Iribarren Ane Eslava

Atzotik, Euskal Herri osoan da indarrean COVID ziurtagiria. Araba, Bizkai eta Gipuzkoako 50 lagunetik goitiko jatetxeetako langile eta bezeroek egun batetik bertzera egokitu behar izan dute neurrira

Miren Basaras. / ©Aritz Loiola, Foku

«Pandemiak loa galarazi dit niri ere»

Ibai Maruri Bilbao - Bizkaiko Hitza

Miren Basarasek esan du txertoak «oso onak» izan arren, transmisioa eteteko neurriak ezinbestekoak direla. Uste du askatasunaren izenean txertoari uko egiten diotenak «berekoiak» direla.

Otxarkoagako bizilagunak, protesta batean, asteartean. / ©Aritz Loiola, Foku

Betiko zerbitzua gura dute Otxarkoagan

Ibai Maruri Bilbao, Bizkaiko Hitza

Kutxabankek astean egun bitara murriztu du Bilboko Otxarkoaga auzoan dagoen bulego bakarreko leihatila zerbitzua. Bizilagunek protestak hasi dituzte. Bankuek, oro har, Bizkaian, bulegoen %45 itxi dituzte azken hamabi urteetan. Kutxabankek dio erabilera gutxitu delako hartu dutela erabakia.

Donostiako Antigua Auzoko Osakidetzako osasun zentroa. ©GORKA RUBIO / FOKU

«Ezin dugu martxa honetan segitu»

Oihane Puertas Ramirez

Lehen mailako arretako langileek salatu dute baliabideak falta zaizkiela. COVID-19a dela eta, osasun etxeetako lan karga «izugarri» handitu zaie, eta «gainezka» daudela sentitzen dute.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.