Noiz sortua: 2017-07-02 00:30:00

LAUHAZKA

Isla autentikoa

Ibon Aranberri -

2017ko uztailak 2

Gaindituta genuelakoan, bueltan datorkigu autentikotasunaren lasta zaharra. Berritutako izurri ikusezina bezala, barruraino sartua dirudi, forma lausoz inguratzen gaitu, noiz eta egitura ideologikoak krisian direnean, defentsa kolektiboak ahuldu zaizkigunean. Edozeren baitan antzeman daiteke bolada, eta inon ere ez.

Oso eraginkorra da nonbait mito jatorraren kudeaketa kontsumo gizartearentzat, ageriko kontraesan filosofikoek aisa desmuntatu badezakete ere. Berezkoa zer den eta zer ez denaren eztabaida antzua dagoeneko alboratua bagenuen ere, boterea aitortzen diogu oraindik irmo eutsiko dion zerbait badenaren usteari. Artefaktu sinbolikoa litzateke, eta badu interes kulturalik gure izaera eta eraikuntza morala ulertarazteko. Bizitzaren afektu eta emozio garbiz bustitako espazioak behar ditugu, kultura ekonomiko hutsetik harago doan zerbait, mozkin zenbakien lehortasunaren gainetik, ondasun espekulazioaren arrunkeriaz libre.

Sarri, nolabaiteko egia egonkortuarekin da nahastua gauza autentikoa. Benetakoa ei denaren erretorika trinkoa gainezartzen diogu, berez egia izan daitekeen ideiak bereziki hauskorra dirudienean, eztabaidagarria, zaila, ebasgarria. Baina autentikotasunak ez du egia finkatzen; aldiz, egiarekiko gure zalantzak areagotzen ditu. Izandakoa preseski hala izan den ez zaigu axola, ordea, moldagarria eta sinesgarria den bitartean.

Horrela, sekula izan ez den edota dagoeneko galdua denaren zantzua nagusituko litzaiguke, oraindik ere bigarren aukera erreklamatzeko garaiz gabiltzanaren itxaropena ez galtzeko edo. Orokorrean, atzera begiratuz aurkitu ohi dugu sasoia, orduan bai ginela gu, eta hori horrela izanik, orain garen hau esperientzia iheskor haren memoria zipriztina besterik ez litzateke, esaterako. Iragandako gertakizunetik hartzen dugu sona, orainaldian kontsumitu ahal izateko.

Ikuspegi idealizatu hauek betebehar zehatz bezain eraginkorra dute marketing diskurtsoaren baitan, horrela, norbanakoaren gorazarrea kontsumo ohiturekin da egoki uztartua, eta harreman sozialen konplexutasunekiko banatua, eragiketa berean. Egun, jendartearen kontzeptua ez da dagoeneko emantzipatuko gaituen euskarri gisa hartua, aitzitik, ihes egin beharrean gara bakoitzari gizarteak ezartzen dizkion ustezko ataka eta alienaziotik. Horregatik, norbanakoa multzoarekiko da kontrajarria, folklore eta errito astun gehiagorik ez, arren, utikan iraganeko manifestazio zarpailak! Kultura estandarizatu, burokratiko, masifikatu eta sintetikoak eratzen du ostera espazio berria, osagaiak lehengoak izanik ere. Komertzializatutako nostalgia bilakatu zaigu existentziaren mamia, inoiz izan ez zuen itxuran bisitatuz bizitza, arantzarik arrastatu beharrik gabe.

Izan ere, autentikotasuna tautologikoa da (den horixe bera izaea), bila aritzea zentzurik gabeko saiakera da, izatekotan. Norberarengan berezkoa den zerbait azaleratzeko esfortzu kasik mistikoa; ez du inolako azterketa enpirikorik onartzen. Desira kontsumitzailearen konplize bilakatzen gaitu, bere liluraren zerbitzari, gure gorputz sozialaren gainean. Besteekiko bizitza erlazioaren esperientziaren beharra zapuzten du, esperientzia bera erosi eta ikusgai jar daitekeen zerbait bailitzan.

Askapen pertsonalak oinarritik irentzen dituen bizitza estilo gaur egungoari nolabaiteko konpentsazioa eskainiko lioke autentikotasunak. Hortik, beti behar dugu nahi gehiago, etenik gabe puztu behar dira kontsumo desirak. Mitoak razionalizatu eta pertsonalizatu egiten du halako prozesua. Autentiko izatea dugu amets, inolako betebehar edo ardurarik ezarri gabe ospea irabaztea aurreikusten digulako. Kidetasun sena asetzen digu, aldi berean aparta izateko nahiarekin harmonizatuz.

Erabiltzailea bera produktu bilakatzeko prozesuaren satisfakzioa ahalbidetzen du autentikotasunaren ideiak, azken batean. Erosgaia ekoizten du eta kontsumo esperientzia eskaintzen, aldi berean. Modu horretako merkantilizazioak ez du halabeharrez erabiltzailearen mundu ikuskera gutxiesten, ostera, nia ulergarri, irisgarri egiten du. Eraldaketa sozialerako grinak eta errebeldiak ez du arriskuan jarriko norberaren autentikotasun komertziala, oso alderantziz, barnetik elikatuko du, gizentzeko.

Edonola ere, berritasuna higatzen zaien heinean, laster galtzen dute produktuek haserako distira. Erabilgarri bilakatzen dira, amankomun, eta zabor birziklagarri gerora. Produktuen logika berean, autentiko gisa sailkatua eta tolestua den izaera ez da gehiagoz gure akats edo ezinen isla. Eraikitako nortasunaz barne-anbibalentziak estaliko ditugu, marka pertsonala etengabe kudeatzera behartuz horrela geure burua, osagai autentikoak balioan jarriz, korapilo emozionalak antzeztuz eta errealitate printzak zirkulazioan jarriz. Normalizatua izan dadin, amorrua leunduko zaio norbanakoari, identitate arautu, ezagun eta xaloagoz berpizteko. Zirkulazioan jarritako ni berri eta subjektiboa izango da aurrerantzean bakoitzari buruzko egia definitiboa.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Goierriko lau udaletako ordezkariak Osasun Sailarekin eta Segurtasun Sailarekin bilduta, atzo arratsaldean, Zumarragan. ©JUAN CARLOS RUIZ / FOKU

Konfinamendurik ez Ordizian, 35 kutsatu dauden arren

Jon Ordoñez Garmendia - Aloña Beraza Peña - Irati Urdalleta Lete

Osasun sailburuak baztertu egin du konfinamendua ezartzea eta joan-etorriak mugatzea. Ordiziako alkateak «transmisio komunitario bat» dela ziurtatu du, eta etxean geratzeko eskatu du.

Urkullu mitin batean, Zornotzan, ekainaren 27an. ©Jaizki Fontaneda / Foku

Urkulluk ez du Ordizian bozketak atzeratzeko asmorik

Igor Susaeta

Eusko Jaurlaritzako jarduneko lehendakariaren ustez, bozkatu ahal izateko baldintzak «guztiz» bermatuta daude.

Hainbat ikusle eta apostu artekari maskararekin, Masterseko partida batean, Iruñean. ©Idoia Zabaleta / FOKU

OMEk dio ezin dela baztertu koronabirusa airetik kutsatzea

Edu Lartzanguren

Baieztatuz gero, Osasunaren Mundu Erakundeak aldatu egingo lituzke leku itxietan ez kutsatzeko jarraibideak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna