Espainiako Konstituzioaren erreformari ekingo baliote, aldaketa horrek ezinbestean «Euskadiren nazio aitortza» jaso beharko luke. Hala adierazi du Jokin Bildarratz EAJk Espainiako Senatuan duen ordezkariak. «Arazoak ez dira konpontzen begiak itxita eta errealitateari bizkarra emanda», esan du.
Espainiako Konstituzioaren urteurrenean, Bildarratzek gogorarazi du euskal herritarren %30ek baino ez zutela aldeko botoa eman duela berrogei urte, hura onartzeko antolatutako galdeketan. Bildarratzek «deigarri» iritzi dio horri, «beste hainbat esparrutan ehunekoak eta gehiengoen osaera auzitan jartzen diren garaian». Gainera, senatari jeltzalearen iritziz, herritarren urruntze hori «egunez egun» areagotzen ari da, «Konstituzioak ez duelako laguntzen planteatzen zaizkion arazoak konpontzen».
Bestalde, Bildarratzen ustez, Konstituzioa bera eta legea betetzen ez direla ikusteak ez du laguntzen herritarren urruntze hori gainditzen, eta Gernikako estatutuaren adibidea jarri du: «Auzitan jartzen dira argi eta garbi dagozkigun eskuduntzak, eta, beste alde batetik, ez zaizkigu aitortzen Gernikako estatutuan ezarritakoaren arabera dagozkigun eskubideak».
Horregatik, nazio aitortza Espainiako Konstituzioan jasotzea proposatu du Bildarratzek, eta galdetu du «nazio errealitateak aitortzeak zer kalte» egingo liokeen «horrenbeste defendatzen duten estatuari».
Dena dela, jeltzaleek badakite Espainian orain nagusi den joera kontrakoa dela; horregatik, «birzentralizazioaren kontrako harresia» eraikitzen jarraituko dutela esan du Bildarratzek.
