Albistea entzun

Koronabirusa

Bigarren kolpea tabernei

Aisialdia kontrolatzeko neurri gehiago jartzear daude erakundeak, eta ostalariek salatu dute tabernetako edukieraren eta ordutegiaren murrizketek «gogor jo» dutela ostalaritza.
Egungo neurri berezietara egokitutako taberna bat, Donostian.
Egungo neurri berezietara egokitutako taberna bat, Donostian. GORKA RUBIO / FOKU Tamaina handiagoan ikusi

Maialen Arteaga, Andoni Rekondo -

2020ko uztailak 29 - Bilbo Donostia

Koronabirusak bigarren aldiz jipoitu du ostalaritza. Kasuen ugaritzeak Euskal Herriko tabernen errealitatea aldatu du. Suspertze bidean zeuden, eta aldapa gora ipinitako egoera aldapa beherakoan jarri nahi zuten. Batzuek oraindik neurri berriei erreparatu ez badiete ere, bigarren kolpe honen zama gehienek nabari dute, eta badirudi eragingo dituen ubelduak aurreikusteko gai direla.

Donostian eta Bilbon galdezka ibili da BERRIA: Belfast, Herria eta Txakurtto tabernetan. Azaldu diote egoera «ezegonkor» batean daudela, «diru iturri nagusia» den gaueko giroa eten dietelako. Konfinamendua oso denbora tarte latza izan da taberna guztientzat, eta pixkanaka erritmoa hartzen hasiak ziren. Astelehenean iragarritako neurri berriak «kolpe gogor» baten modura hartu dituzte. «Guk neurri guztiak bete ditugu, eta hau kolpe lazgarria izango da guretzat» , azaldu dute Belfast tabernako kideek. Ezarritako neurri guztiak «zorrotz» bete dituztela esan dute gainontzeko tabernariek ere, eta egun daukaten egoeraren ondorioz «oso kezkatuta» daudela.

Testuinguru berri honekin sortu zaien ezjakintasunaren aurrean, etorkizuna ere lainotuta dute tabernek: «Neurri hauekin aste batzuk irauteko gaitasuna dugu; hortik aurrera, batek daki», azaldu dute, esaterako, Belfasteko tabernariek.

Begirada etorkizunean jarrita, zailtasunak izango dituztela iragarri dute besteek ere. Egoera horri aurre egiteko, iraupenaren borrokan, horma handiagoak dituzte taberna txikiek. Pilar Oleaga Bilboko Zazpikaleetako Txakurtto tabernaren jabea da, eta uste du neurriak ez direla egokitzen taberna txikietara. Bere tabernaren egiturak ez dio uzten neurri berriak betetzen, eta, ahalegin horretan, udalaren jarrera desegokia iruditzen zaio: «Diskriminazioa egon da tabernen artean: guztiei ez dizkiete baimen berak eman», kontatu du Oleagak, haserre. Izan ere, terrazadun tabernak ditu auzokide. Aldiz, berari behin baino gehiagotan eman diote ezetza. Horrela, Txakurtto tabernak irauteko berme gutxiago dituela adierazi du. Taberna ereduak ere asko baldintzatzen du negozioaren etorkizuna: «Bazkariak eta pintxoak eskaintzen ditugunok badugu euskarri bat. Gaueko tabernek zailtasun handiak izango dituzte», adierazi dute Herriako tabernariek.

Kontrola

Bizirik irauteko guda gutxi ez, eta jendea kontrolatzeko lana ere bete behar dutela salatu dute ostalaritzako langileek: «Tabernariok ez gara polizia lanak egiten jarriko». Hala ere, neurriak onartu eta «irenstea» beste alternatibarik ez dutela azaldu du Oleagak: «Dena inposizioa da. Haiek agindu, guk obeditu; eta obeditzen ez badugu, isuna». Hartutako neurri askorekin «oso haserre» daudela adierazi dute tabernetako langileek.

Neurri berrien helburua birusa desagerraraztea bada, ez dituzte ulertzen turismoaren kudeaketan ikusten dituzten «kontraesanak». Donostiako tabernariek turista asko ikusten dituzte, eta gogoeta eragiten die horrek, kritikoa. «Parranda galarazten dute, eta turismoa sustatu. Ez du zentzurik», adierazi dute Herriako tabernariek. Belfasteko kideak ere kexu ageri dira hartutako erabakiekin, eta beti «zentzuz» jokatzen dutela gehitu dute: «Neurriak bete arren, eguneko edozein unetan kutsa daiteke jendea; aldiz, goizerako eta arratsaldetarako ez dute neurririk hartzen». Oraingoa «jokatzeko azken pultsua» izatea espero dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Sandra Barkaiztegi eta Olatz Mercader, atzo egin zuten agerraldian, Onkologikoaren aurrean. ©ANDONI CANELLADA / FOKU

Arta «integralaren» eskean

Arantxa Iraola

Onkologikoko pazienteek eratutako elkarte bat plazara atera da; kezkatuta daude zentroan gaixoen arretak izan duen «bilakaeraz». Manifestazio bat egingo dute langileekin batera, hilaren 15ean
Euskararen Egunaren harira Elgoibarren 2015ean eginiko egitasmo bat. ©BARREN.EUS

Aterki bat euskaltzaletasunari

Julen Aperribai

Euskara elkarteen baturatik sortu bazen ere, mugimendu izaera hartu zuen Euskaltzaleen Topaguneak 2012an. 25. urteurrena ospatuko du gaur Donostian, gaurko erronketan begia jarrita

45 minututik bost ordura

A. Iraola

Olatz Mercaderrek berriki jaso du arta Onkologikoan; ama 2012an zendu zitzaion, han arta jasota. Alde argiak ikusi ditu, pazienteen arreta egokiaren kalterako.
Emun kooperatibaren 25. urteurrenaren ekitaldia, atzo, Arrasaten. ©JON URBE / FOKU

Emun, 25 urte eraldaketan

Irati Urdalleta Lete

Emun kooperatibak 25. urteurreneko ekitaldia egin du Arrasaten. Eraldaketaren beharraz aritu dira, eta hura bizi edo eragin duten zenbait pertsonaren esperientziak bildu dituzte

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...