'Druk / Another Round'

Zuzendaria: Thomas Vinterberg. Aktoreak: Mads Mikkelsen, Thomas Bo Larsen, Magnus Millang, Lars Ranthe, Maria Bonnevie. Herrialdea: Danimarka - Suedia - Herbehereak. Iraupena: 116 minutu.

Thomas Vintenbergek, Festen eta The Hunt filmen zuzendariak besteak besta, bere lan berria aurkeztu du jaialdian.

Druk-ek, mozkor, hip, zotinka edango digu, barka, esango digu zein den alkoholaren efektuaren magia. 0'5mg alkohol odolean. Bi zerbeza adina, bi ardo, bi patxaran, vodka kopa bat. Alkoholimetroa piztu eta... errodatzera.

Zirikatzaile petoa dugu Vinterberg, eta hala agertuko zaigu azken pelikulan ere. Umorea, ironia eta kritika izango ditugu bertan. Film arina da Druk, baina horrek ez du esan nahi edukirik gabea denik, umorea izango delako ikuslea mozkortzeko erabiliko duen substantzia.

Institutuko irakasleen lagunartea da hizpidea. Esperimentu psikologiko-etiliko bat garatuko dute, zeinetan, epe jakin batean, ahal den neurrian, odolean 0'5mg alkohol izan beharko duten etengabean. Ideia itzela da teorian, zentzugabea dirudi praktikan, baina aizue, funtziona!

Aktore lana apartekoa da; zuzendariaren aktore kuttunenak dira, tartean Mads Mikkelsen ezin hobea. Gizon grisa, itzalia, automata. Bizipoza galdu duen irakaslea, aita, senarra. Nortasuna galdu zuen nonbait, ikusezina zaion noraezean egiten duena etxetik lanerako errutina.

Bada filmaren edukia eta mezua zalantzan jarriko dituenik, eta ulertzekoa da, alkoholaren eta mozkorkeriaren apologia egiten duela eman baitezake hasiera batean. Baina ez da horren sinplea. Esan bezala, zuzendariak umorea erabiliko duelako ikuslea mozkortzeko, eztitzeko. Protagonistek jasango dutenaren pareko prozesuan, gu nahasten saiatuko da, arrazoimena profil baxuenean manten dezagun, arintasunean, umorean, irents dezagun tesia. Pelikula hori guztia baino abilagoa izango da.

Druk-en alkoholaren imajinarioa zeharkatuko dugu, alde onak, mitoak, kalte ordainak, ondorioak. Eta zein da ondorioa? Bizitza bakarra dela, eta akabo. Mozkortu zaitezke, lokartu, eta bizitza pasatuko da, albotik, konturatu gabe. Filmak bizitza goraipatzen du, bizipoza, alaitasuna eta lotsagabekeria.

Bakoitzak nola biziko duen norberaren esku geratzen da; hori bai, bihar beranduegi izango da.

Orain da momentua; edan dezagun bizitzaren alde. Topa.