Krabelin malkoak, tantaka

Espainiako Polizia Armatuak German Rodriguez tiroz hil zuenetik 42 urtera, «justizia» eskatu du 78ko Sanferminak Gogoan taldeak, «inpunitatea erauzteko».
Ehunka pertsona bildu dira German Rodriguezen omenezko oroitarriaren inguruan, krabelinak uzteko.
Ehunka pertsona bildu dira German Rodriguezen omenezko oroitarriaren inguruan, krabelinak uzteko. IDOIA ZABALETA / FOKU Tamaina handiagoan ikusi

Ion Orzaiz -

2020ko uztailak 9

Tantaka. Lore-orri zuriak eta gorriak, bata bestearen atzetik, harriaren gainean pausatzen. Aurten, uholderik ez; banan-banan isuri dira krabelinak, malkoak balira bezala, German Rodriguezen oroitarriaren gainean. Ilaran jarri da jendea, 1978ko uztailaren 8an Rodriguez zerraldo erori zen tokiaren aurrean makurtu eta, hari gorazarre egiteaz gain, «egia, justizia eta ordaina» aldarrikatzeko.

Urtero, ekitaldia antolatzen du 78ko Sanferminak Gogoan elkarteak, Orreaga etorbideko oroitarriaren aurrean. Aurten, 1978ko sanferminen 42. urteurrenean eta COVID-19ak eragindako egoera ezohikoak behartuta, beste era batera prestatu behar izan dute omenaldia: goiz osoan oroitarriaren aurrean krabelin zuriak eta gorriak paratzeko deia egin zuten antolatzaileek iragan astean, jende pilaketak eragozte aldera.

Hala egin dute askok, eta, goizean goizetik, kolorea ematen hasi zaizkio harri gris berdekarari. Lore gorri bat, beste bat. Maskarek estalitako musu isilak eta segurtasun tartedun besarkadak. Tantaz tanta, baina, betez joan da etorbide zabala.

Lore eskaintza eginda ere, ingurumarietan gelditzea erabaki dute familia eta kuadrilla askok. Deialdiarekin bat egin dute kultura munduko, sanferminetako eta Iruñeko hainbat gizarte mugimendutako eragileek, eta Jarauta 69 txaranga ere bertaratu da, jai giroko piezekin ez ezik, protesta kantuekin ere giroa gozatzeko. Eguerdirako, ehunka pertsona daude Orreaga etorbidean bilduta. «Arduraz» jokatzeko mezuak, megafonotik: «Ea, mesedez, markak jarri ditugu zoruan, jendea toki berean pilatu ez dadin. Gorde ezazue segurtasun tartea», esan dute antolatzaileek, behin eta berriz. Maskarak janzteko ere eskatu dute: «Ez da aukerazkoa; jantzi behar dituzue halabeharrez». Bertaratuak saiatu dira neurriak betetzen, baina, jadanik, beste urte batzuetako tamaina hartua du jende oldeak. Zaila da segurtasun tarteak errespetatzea.

Beste urte batzuetan baino ekitaldi «xumeagoa» egin nahi izan dute 78ko Sanferminak Gogoan taldeko kideek: bi dantzarik aurreskua dantzatu dute oroitarriaren aurrean, eta Sarai Robles bertsolariak bertsoz oroitu du German Rodriguez. Horren ostean, hitza hartu du Amaia Kowasch elkarteko bozeramaileak. «Inpunitatea erauzteko» deia egin du: «[Rodolfo] Martin Villa [Espainiako Gobernazio ministro ohia] epaitu behar dute. Dagoeneko inputatuta dago Argentinako kereilan; espero dezagun hori lehen urratsa izatea, frankismoko eta Trantsizioko erailketen inpunitatea ezerezean uzteko».

Bi kartel handi paratu dituzte Rodriguezen omenezko oroitarriaren alde banatan: 78ko Sanferminak Gogoan elkartearen ikurra, krabelin gorriz eta zuriz osatua; eta elkarteko kide zen Antonio Salinas Madero-ren argazki handi bat. Hari ez ezik, Argentinako kereilako sustatzaile izandako Jose Maria Galante Chato-ri ere gorazarre egin diete. Berriki hil ziren biak ala biak, COVID-19 gaitzak jota. «Justizia lortzeko egin zituzten ahaleginak gauzatuta ikusi gabe utzi gaituzte bi borrokalariok, eta, bitartean, Antonio Gonzalez Pacheco Billy el Niño-ren gisako torturatzaileak mundu honetatik joan dira, beren domina eta aintzatespen instituzional guztiekin», esan du Kowaschek.

Ekitaldian, halaber, gogoan izan dituzte 1978an Donostian hildako Joseba Barandiaran, 1976ko martxoaren 3an Gasteizen izandako sarraskiaren biktimak eta baita 1978ko sanferminetan Espainiako Poliziak zauritutako pertsona guztiak ere.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du agerraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren hutsegiteak berriz ere egin ez daitezen, eta aurrera begira ikasteko.

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Xixilu jatetxean, eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta uztailaren 31tik abuztuaren 4ra jatetxean egondakoek. Galdakaon, tabernan uztailaren 27tik abuztuaren 4ra egon zirenek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna