Noiz sortua: 2020-03-27 00:30:00

Koronabirusa

Inoizko igoerarik handiena izan da Hegoaldean: 41 hildako eta 889 kasu

Jaurlaritza eta Nafarroako Gobernua hotelak prestatzen ari dira gaixoentzat. 5.374 positibo baieztatu dituzte, eta 230 pertsona hil dira
Gurutzetako ospitalea.
Gurutzetako ospitalea. LUIS TEJIDO / EFE

Paulo Ostolaza Irati Urdalleta Lete -

2020ko martxoak 27
Gaurdaino, egunetik egunera erregistratu den hazkunderik handiena izan da asteazkenetik ostegunerakoa. Guztira, 5.357 kasu atzeman dituzte Hego Euskal Herrian, azken zenbaketan baino 889 gehiago. Lurraldez lurralde, Bizkaian izan da hazkunderik handiena (349), eta 1.850 lagun daude gaixo guztira. Araban, berriz, 1.435 daude gaitzak jota (+228). Nafarroaren ere asko ugaritu da gaitza —214 kasu berri daude, eta, guztira, 1.441 pertsonari erasan die koronabirusak. Gipuzkoan, 661 gaixo daude (+98).

Gaixo horietako zenbait ospitalean daude. Zehazki, 849 Bizkaian, 649 Nafarroan, 325 Araban eta 201 Gipuzkoan. Gainera, 191 zainketa intentsiboetako unitatean daude. Ipar Euskal Herrian zaila da kutsatuak zehaztea, baina hamabost pertsona daude Baionako ospitalean, eta Zuberoako bi Pauekoan (Okzitania).

Dagoeneko 230 pertsona hil dira —41 azken 24 orduetan—. Lurraldearen arabera, Araban daude hildako gehienak (94), eta haren atzetik daude Bizkaia (65), Nafarroa (49) Gipuzkoa (21) eta Zuberoa (1). Datu positibo bakarra, egunetik egunera gora egiten ari dela sendatutakoen kopurua ere: 656 osatu dira, asteazkenean baino 167 gehiago.

Nekane Murga Eusko Jaurlaritzako Osasun sailburuak azaldu duenez, baieztatutako kasuen gorakadak zerikusia du egiten ari diren proba kopuruarekin. Asteazkenean 1.511 proba egin zituen Osakidetzak, hiru egun lehenago egin halako bi. Guztira, 10.000 proba pasa egin dituzte.

Gainera, Murgak nabarmendu du Gasteizko hotel bat osasun materialez hornitu dutela, «zaintza eta sostengua» behar dituztenentzat, baina ez ospitaleratzea. «Ikusi dugu senda-agiria hartutako asko arriskua dutenekin bizi direla eta ez dutela bakartzeko baldintza egokirik». Nafarroan ere hotelekin lanean ari direla esan du Santos Indurain Osasun kontseilariak. «Azken xehetasunak lantzen gabiltza».

Langileek duten materialari dagokienez, Murgak esan du zuzentzen duen sailaren «erabateko lehentasuna» dela langileak babestuta egotea, eta gehitu du asteazkenean 223.640 maskara eta eskularru eman zizkietela udalei eta mankomunitateei.

Albiste gehiago

Martxoaren 30ean eguneratua, 14:00etan. ©BERRIA

Koronabirusaren azken datuak

Berria

Euskal Herrian 8.225 gaixok eman dute positibo koronabirusaren proba eginda, administrazioen arabera. 400 hil dira. COVID-19 gaitza izandako 1.807 pertsonari eman diete alta. Grafikoak, albiste barruan.

Lantegiak itxita, Basaurin. ©Marisol Ramirez / Foku

Kutsatzeko kezka dute Arabako, Bizkaiko eta Gipuzkoako biztanleen bi herenek

Berria

Espainiako Gobernuak atzo onartutako dekretua indarrean da, eta funtsezkoak ez diren jardueretan aritzen diren langileek etxean geratu beharko dute gaurtik aurrera. Urkullu ez dator bat neurri horrekin, ezta patronala ere. Txibitek Sanchez babestu du, baina uste du hobe litzatekeela jarduera ekonomikoa ez geratzea eta erabaki hori malgutzea.

Sidenor enpresako langileak jarduera eteteko eskatzen, aurreko astean. ©MARISOL RAMIREZ / FOKU

Jaurlaritzak letra txikiari heldu nahi dio gutxieneko jarduera bati eusteko

Xabier Martin

Madrilen azalpen gehiagoren zain dago, baimena nahi duelako enpresei isunik jar ez diezaieten

Ospitale bateko larrialdietako sarrera ©Jon Urbe / Foku

Koronabirusa zuten 400 pertsona hil dira Euskal Herrian, eta 8.225 pertsona kutsatu

Irati Urdalleta Lete

50 pertsona hil dira atzotik, eta 452 pertsona gehiagori atzeman diete birusa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna