LARREPETIT

Konpromisoa

Iñigo Aranbarri -

2018ko otsailak 25
Dena doa ustelbidean memoriak gorde ezean. Horrexegatik, hau itzartzen delarik, beste neurri bat du guztiak, bizitakoa ez da hemerotekara kondenatzen, hitzak ez ditu haizeak eraman. Biharko egunak dakarkiguna atzoko izpiz dator.

Hamabost urte Espainiako Auzitegi Nazionaleko Juan del Olmo epaileak Euskaldunon Egunkaria zarratzea erabaki zuenetik. Iragana da, baina geurekin bizi da: atxiloketak, torturak, erredakzio giltzatuak, jendearen galda kalean eta politikarien adierazpenak. Gezurra zirudiena, errealitatean instalatua; eta bat-batean dena oso primitibo bilakatu zitzaigun: emozioen erasana eta geure hizkuntzan genuen egunkari bakar hori gabe geratzea. Politikan, zatiketa. Erokeriaren logikan sartu ez zirenek zin egin zuten jota zegoen komunitatearen aurrean: «konpromisoa hartzen dugu halakorik gerta ez dadin berriro».

Eta efemeridearen lurrunetan, orduko galderak lotu nau. Eta hori, nola egiten da? Zer baliabide dituzte borondate hutseko politikariek gorilaren atzaparkadei aurre egiteko? Eskertuko nuke norbaitek azalduko balit, zeren inpresioa baitut zorte kontua besterik ez dela, haize ufaden kapritxoen esku utzia dugula etorkizuna.

Egun bakar batean, eta orduko alderdi bera dagoela gobernuan, obra bat erretirarazi da arte erakusketa batetik eta liburu baten salmenta debekatu. Aste berean, hiru urteko kondena ezarri zaio kantari bati, kantatzeagatik; Amnesty Internationalek Espainia salatu du giza eskubideak urratu dituelakoan Katalunian; politikari batek Suitzan topatu behar izan du abaroa, eta ez diru publikorik ebatsi duelako...

Eta nik jakin nahi dut nola egiten den, nola babestu behar gaituzten hitz eman zuten haiek han beharrean hemen jotzen badu berriz, nork defendituko gaituen, eta nola, dagoeneko kontrol modu guztietarik jarei dabilen gorilarengandik, konpromisoa ere hitz ustel horietarik izan ez dadin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna