Albistea entzun

Espainiako Gorteetarako hauteskundeak

Navarra Sumak Sanchezi eta independentistei aurre egiteko nahi ditu botoak

Botoa eskatu diete independentismoak gobernua baldintzatzea nahi ez duten nafarrei. Maria Txibiteren «koherentzia falta» ere salatu dute
Navarra Sumako hautagaiak, atzo, Iruñeko ekitaldian.
Navarra Sumako hautagaiak, atzo, Iruñeko ekitaldian. BERRIA Tamaina handiagoan ikusi

Irati Urdalleta Lete -

2019ko azaroak 8

Apirilaren 28ko hauteskundeetan Navarra Sumak eskuratu zuen boto gehien Nafarroan. Oraingoan ere, helburu bera izango dute, eta, horretarako, kanpainan azken txanpan sartuta daude. Espainiako Senaturako hautagai Alberto Catalan eta Amelia Salanueva Iruñean izan dira. Catalanek «boto baliagarria» eskatu die beren ideologia edozein izanda ere Espainiako Konstituzioan eta Nafarroako Foru Hobekuntzan sinesten dutenei; Nafarroa erakunde propioak dituen erkidego banandua izaten jarraitzea baina Espainiaren barruan segitzea nahi dutenei; eta independentistek gobernuaren erabakietan ez dutela eragin behar pentsatzen dutenei.

Horri lotuta, Catalanek esan du «ezinbestekoak» direla «herritarren arteko errespetua eta erakundeekiko leialtasuna». Ziurtatu du Katalunian ez direla hori betetzen ari, eta «sezesionismoaren aurka daudenek indarkeria eta mehatxuak» jasaten dituztela. Horri aurre egiteko proposamenak ere egin ditu: «Konstituzio gehiago, legea betetzea eta herrialde honek aurrera egitea ahalbidetu duten elkarbizitza arauak berrezartzea». Aldi berean, kritikatu egin du Quim Torra Kataluniako presidentearen jarrera, Catalanen hitzetan ez duelako indarkeria gaitzesten.

Kataluniako egoerari ez ezik, Espainiakoari ere egin diote erreferentzia. Catalanek iragarri du «hodei beltzak» datozela ekonomian, eta esan du independentistek ez diotela mesederik egiten horri: «Argi dago independentismoak inoiz ez dituela konponduko espainiarrek dauzkaten benetako arazoak».

Pedro Sanchezi buruz ere mintzatu da, eta independentistekin duen jarrera salatu du: «Isildu egiten da, Moncloara iristeko berriro ere independentisten botoak onartuko al dituen galdetzen diotenean». Horrela, independentistekin itunak egiteko «ateak zabalik» uzten dituela ziurtatu du. Gainera, Salanuevak kritikatu egin du Espainiako jarduneko presidenteak fiskaltza gobernuaren esku dagoela esan izana.

Nafarroako Gobernuko presidente Maria Txibite ere aipatu du Catalanek, «koherentzia falta» egozteko: «Gauza bat esaten zuen legegintzaldiaren aurretik, eta orain, beste bat». Horrez gain, Salanuevak aurpegiratu dio «nazionalistekin, populistekin eta Bilduren abstentzioarekin» gobernatzen ari dela.

Navarra Suma konponbidea

Navarra Sumarentzako botoa eskatzeko baliatu dute ekitaldia, «nafar gehienen sentimendua» ordezkatzen dutelakoan. «Arazoentzako konponbideak eta egonkortasuna nahi dituzte, eta ez dute gustuko Sanchezek populistekin edo independentistekin gobernatzea», esan du Salanuevak. Urte eta erdiren ondoren, Pedro Sanchezen gobernuarekin, «blokeo politikoa eta erakundeetako krisia» soilik lortu direla ere nabarmendu du. Adibidetzat hauek jarri ditu: langabezia datuak «azken zazpi urteetako okerrenak» izatea, eta Europak berriro esatea ez direla beteko hazkunde eta defizit aurreikuspenak.

Horri guztiari aurre egiteko eta Sanchezek ez gobernatzeko, Navarra Sumak «ahalik eta boto gehien» behar duela azpimarratu dute. «Senatuan konstituzioaren aldeko gehiengoa berreskuratu behar dugu; beharrezkoa izango balitz, 155. artikulua ezartzeko». Salanuevak nabarmendu du azaroaren 10a «egun garrantzitsua» izango dela, eta azaroaren 11 ezin dela izan «damututakoen eguna».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Enrique Maia Iruñeko alkatea. ©Iñaki Porto / EFE

Iruñeko alkatea arbuiatzeko adierazpena aurkeztuko du EH Bilduk

Berria

Adierazpen xenofoboak «daturik eman gabe» egitea eta «kolektibo oso ahulak jomugan jartzea» egotzi dio koalizioak Enrique Maiari.

Altsasuko gazteen alde egindako mobilizazio bat, 2019ko urrian. ©IÑIGO URIZ / FOKU

Estrasburgok ez du aintzat hartu Altsasuko auziko gazteek egindako salaketa

Gotzon Hermosilla

Auziak Europan izan zezakeen bide judiziala amaitu egin da. Gizarteak emandako babesa nabarmendu du Altsasu Gurasoak plataformak

<em>Mozal legearen</em> aurka egindako protesta bat, Iruñean. ©JAGOBA MANTEROLA / FOKU

Mozala nola kendu

Iosu Alberdi

Kongresuko Barne Gaietarako Batzordera iritsi da 'mozal legea' erreformatzeko proposamena. Indar parlamentarioen lana izango da orain aldaketen nondik norakoak eztabaidatu eta adostea.

EH Bildu eta PSE-EE bildu dira gaur, Bilbon ©Amaya Diaz-Emparanza

Anduezak adierazi du ez duela proiekturik partekatuko EH Bildurekin, ETA gaitzetsi arte

Oihane Puertas Ramirez

Anduezak uste du bi alderdiek zenbait herritan dituzten akordioak «puntualak» eta positiboak direla, baina ez du uste egoera egokia denik «pisuzko akordioak» egiteko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.