Arantxa Urretabizkaia. (Donostia, 1947)

Ibilbide oparoa du euskal literaturan eta kazetaritzan, eta euskaltzain urgazlea ere bada, baina «markatuta» dago Hondarribian: «Nik ordezka dezaket euskal literatura Chicagon, Mexikon edo Milanen, baina Hondarribian ez; eta bizitza erdia baino gehiago egin dut hemen, 1981etik». Emakumeek parte hartzearen aldeko borrokan sufritutakoak eta hausnartutakoak liburu batean bildu zituen iaz: Bidean ikasia (1993-2016). Hain justu, iaz desfilatu zuen azken aldiz. «Banekien ezin zela beti jarraitu; fisikoki oso neketsua da, eta konpainian ere zaharrena nintzen», esan du, zaharra hitza aldarrikatuz.