Albistea entzun

Kuartelei eraso diete Burundin

Bujumburan hamabi erasotzaile hil dira, maiatzeko estatu kolpe saiotik izaniko borroka larrienetan
Burundiko armadako soldaduak, Bujumburu hiriburuan patruilan, maiatzeko estatu kolpe saioan.
Burundiko armadako soldaduak, Bujumburu hiriburuan patruilan, maiatzeko estatu kolpe saioan. DAI KUROKAWA / EFE Tamaina handiagoan ikusi

Xabin Makazaga -

2015eko abenduak 12

Ondo armatutako matxinoek Burundiko armadaren bi kuarteli eraso zieten Bujumbura hiriburuan, atzo goizaldean, eta borroketan gutxienez hamabi erasotzaile hil eta 21 atxilotu zituzten. Mujejuru hirian ere base militar bati eraso egin zioten, maiatzeko estatu kolpe saiotik herrialdean izan diren borroka gogorrenetan. Hainbat eragilek ohartarazi dute gerra zibilaren atarian dagoela Burundi.

Bujumburan, soldadu eskola batean eta Ngagara auzoko base militarrean sartzen saiatu ziren matxinoak, eta, hiriburutik 40 bat kilometrora, beste base militar bati eraso zioten Mujejurun. «Soldaduak erne zeuden, eta erasotzaileei aurre egin zieten», esan du armadako bozeramaile Gaspard Baratuza koronelak. Erasotzaileen asmoa kuartel militarretatik armak eta munizioak hartu eta ondoren Mpimbako kartzela nagusiari erasotzea zen, presoak askatzeko. Hala jakinarazi du Baratuza koronelak: atxilotutako matxinoek «aitortu» bide dute eraso koordinatuen helburua.

Zortzi hilabete badira Burundin Pierre Nkurunziza presidentearen kontrako protestak hasi zirenetik. Konstituzioa aldarazi egin zuen apirilean, hirugarren agintaldira aurkeztu ahal izateko, eta uztailean hautatu zuten berriro presidente. Tartean, maiatzean, estatu kolpe saio bat ere izan zen Burundin, nahasia —presidenteak berak antolatu zuela dioenik ere bada, aurkariei aurrea hartzeko—, eta, ordutik, etengabeak izan dira segurtasun indarren jazartze operazioak eta borroka armatuak. 200 hildako baino gehiago izan dira.

Hegaldiak bertan behera

Egoera «kontrolpean» dutela nabarmendu zuen atzo Burundiko armadak, eta hiriburu inguruko errepide nagusiak moztu egin zituzten. Baina tokiko hedabideek egun guztian tiro hotsen berri eman zuten hiriburuan, eta Bujumburako auzoetan artilleria ere baliatu zutela eman zuten aditzera. Erasoetan bost militar zauritu zirela jakinarazi du Baratuzak, baina, aurrez, bost militar hil zirela esan zioten Reuters agentziari soldaduek.

Burundiko egoera nahasiagatik, Kenya Airways eta RwandAir konpainiek hegaldiak eten egin zituzten atzo Bujumbura hiriburuko aireportura.

Burundin 300.000 heriotza inguru eragin zituen gerra zibilak (1993-2005), hutu eta tutsi etnien arteko borroka betean. Sarraskia bake akordio batekin amaitu zuten, eta, ordutik, Pierre Nkurunziza da presidente. Azken urtean 300.000 herritarrek egin dute ihes Burunditik, eta NBEk gogor esku hartzeko eskatu dio Afrikako Batasunari.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Gaiak

Albiste gehiago

Emakume bat, Ukrainako soldadu bat irudikatzen duen mural baten aurretik pasatzen, Kieven, lehengo astean. ©EFE

Ukrainak segitzen du frontearen hegoaldean presioa handitu nahian

Igor Susaeta

Kievek jakinarazi du bederatzi pertsona hil zituela duela bi egun Krimean egindako bonbardaketan; aldarrikatu du, gainera, Zaporizhian «aurrerapauso handiak» ematen ari dela kontraerasoan
Pertsona batzuk Europako Batasunaren bandera baten aurretik pasatzen, Berlinen. ©OMER MESSINGER / EFE
Ukrainako armadako soldadu bat, tanke bat ondoan duela, aurreko uztailean Donetsk eskualdean (Ukraina). ©OLEG PETRASIUK / EFE

Fronteko lerroa ia ez da mugitu

Igor Susaeta

Hiru hilabete igaro dira Ukrainak kontraerasoa hasi zuenetik, baina ezin izan du eman aurreikusitako aurrerapausorik. Horrek eragina izan dezake Mendebaldearen jarreran.
Brasilgo indigena bat, atzo, herrialdeko Auzitegi Gorenaren aurrean, negarrez, indigenen lur jabetza eskubideari buruzko epaiaren berri izan ostean. ©Andre Borges, EFE

Indigenen jabetza eskubidea mugatzearen kontra ebatzi du Brasilgo Gorenak

Gorka Berasategi Otamendi

Nekazaritza eta abeltzaintza industrialaren lobbyak eta ultraeskuinak aurkeztutako argudioen kontra egin du epaileen gehiengoak. Horiek eskatzen zuten indigenen lurren aitortza mugatzea 1988an okupatuta zituztenetara.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...