Gutxitan lehiatuko ziren AEBetan horren ospe txarreko bi hautagai. Clinton eta Trump zailak dira maitatzeko, eta litekeena da astearteko boto gehienak ez izatea inoren aldekoak, norbaiten aurkakoak baizik.
Bada, nola iritsi dira alderdiak egoera honetaraino? Azalpen posible batek dio primarioetan dagoela koska. Demokraten eta errepublikanoen arteko polarizazioa bikoiztu egin da azken hogei urteotan, eta, gaur egun, gai oinarrizkoenetan ere ez datoz bat: trumpzaleen %81ek uste dute AEBak okerrago daudela duela 50 urte baino; clintonzaleen %19k baino ez dute hala uste. Alderdietako kideek elkarri buruz duten irudia ere okertu egin da nabarmen. Polarizazio handiena «politikoki aktiboen» direnen artean antzeman dute: primarioetan hautagaia erabakitzen duten militanteengan, alegia.
Alderdi Demokrataren lehenbiziko itzulian, nabarmena zen muturrerako joera. Bernie Sanders eta Clinton ikusita, nekez pentsa zitekeen alderdi berekoak zirenik: hautagai bat izan litekeen bezain ezkertiarra zen lehena, gobernu zaharren ondorengoa bigarrena. Aukera pragmatikoa, moderatuagoa nagusitu zen azkenean: Clinton gutxiren faboritoa zen, baina kontsentsuzko hautagaia izan zitekeen gutxienez, eta Sanders baino zubi hobea errepublikanoengana heltzeko.
Errepublikanoen bandoan ere bazeuden aukera moderatuagoak, baina bi eskuindarrenak heldu ziren azken fasera: Ted Cruz eta Trump. Alderdien barruko aniztasunaren ordez, bakoitzaren aurpegi muturrekoena dago orain bozetako menuan.
ANALISIA
Nondik atera dira hautagai hauek?
Iruzkinak
Ez dago iruzkinik
Ordenatu