Albistea entzun

Bortz lagun hil dira Marokon manifestazio batean

Berria -

2011ko otsailak 22

Marokoko protestak anitz indartu dira azken egunetan, bereziki herenegun deitutako Duintasunaren Egunaren harira. Gertakaririk larriena Al Hoceima hirian izan da, herrialdearen iparraldean. Barne ministro Taib Txerkauik atzo jakinarazitakoaren arabera, igande arratsean manifestariek banku baten bulegoei su eman zieten, eta barrenean zeuden bortz lagun hil ziren. Eskualde berean atzo ere egun istilutsua izan zuten. Imzuren herrian aldaketa politikoak eskatzeko manifestazio bat antolatu zuten. Beni Buaiatx herriko bizilagunak Imzurengo manifestaziora zihoazenean hasi ziren istiluak, Polizia bidera atera baitzitzaien. Poliziaren hiru auto erre zituzten manifestariek. Rabaten ere Polizia Facebook bidez deitutako manifestazio baten aurka oldartu zen, eta zauritu bat ospitalera eraman zuten. Marokoko errege Mohamed VI.ak, berriz, «egiturazko aldaketekin konprometituta» dagoela adierazi du. Marokoko Gizarte eta Ekonomia Kontseiluko kideen izendapen ekitaldian egin ditu adierazpen horiek. Kontseilu horren sorrera «dinamika erreformistaren» adibidetzat paratu du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...