GASTEIZ. Elkarrekin Podemos IU-k 101 zuzenketa aurkeztu dizkie Eusko Jaurlaritzak egindako Ingurumen Arloaren eta Ondare Naturalaren Kontserbaziorako lege proposamenari. Ingurumen arloan 34 zuzenketa proposatu dituzte; ondare naturalak babesten dituen legean, berriz, 69. Bereziki, ingurumen arloan erronka «inportanteak» daudela azpimarratu zuen atzo Miren Gorrotxategi bozeramaileak, egitasmoan jasotakoak nahikoa ez direla iritzita. Dena den, jarrera «negoziatzailea» daukatela baieztatu du Gorrotxategik. Eusko Jaurlaritzak ingurumen arloan aurkeztutako lege proposamenak industriaren jarduera lehenesten duela kritikatu zuen, esanez enpresak babesten dituela lege egitasmoak, eta ez ingurumena eta osasuna. Enpresen hondakinen eta poluzioaren kontrolak «berehalakoa» izan behar duela uste du koalizioak, Zaldibarko zabortegiko «arduragabekeria» berriz ez gertatzeko. Bestalde, naturgune babestuetan obrak eta instalazioak «debekatu» behar direla azpimarratu du. Iazko azaroaren 3an onartu zuen gobernuak legea, eta Eusko Legebiltzarrean dago, tramitean.
EPk 101 zuzenketa aurkeztu dizkio Ingurumen Legeari
Koalizioa negoziatzeko prest agertu da, baina salatu du lege proposamenak industria jarduera lehenesten duela
Iruzkinak
Ez dago iruzkinik
Ordenatu
