COVID-19aren datuak, «kezkagarriak»

GASTEIZ. Eusko Jaurlaritzako lehendakari Iñigo Urkulluk hizpide izan zuen atzo COVID-19aren izurria, eta azken egunotan datu epidemiologikoak «kezkagarriak» direla esan zuen. Kutsatuen intzidentzia metatuan igoera bat izan da, eta horren harira egin zuen ohartarazpena; adierazi zuen, hala ere, espero dutela kasuen igoera hori ez izatea izurriaren olatu baten sorburua, eta, ondorioz, irmo eutsi ahal izatea orain aste bi osasun larrialdia bertan behera utzi zutenean hartu zuten erabakiari. Era berean, esan zuen espero dutela berriz martxan jarri beharrik ez izatea Labi, igaro hilabeteetan murrizketa neurriak hartzeaz arduratu izan den batzordea.

Eusko Jaurlaritzako Hezkuntza Sailak eskoletan izurria ez zabaltze aldera aurkeztu zuen azken protokoloaren harira kexak egon dira, Lehen Hezkuntzan haurrek jolas garaian ere maskara jantzita eduki beharko dutelako bereziki. Erabaki horri eutsiko diotela esan zuen atzo, ordea, Osasun sailburuak: «Babesteko era bat da».