Vallsek jarraitu egingo du, PS hirugarren indar bihurtu arren

Frantzian «lurrikara» izan zela onartu zuen Manuel Valls Frantziako lehen ministroak. Gogor kolpatu dituzte han sozialistak Europako Parlamenturako hauteskundeek: hirugarren indarra izatera pasatu da gobernuan dagoen alderdia, botoen %14rekin, Fronte Nazionalaren eta UMPren atzetik. Hala ere, Vallsek legealdia bukatuko duela iragarri du, eta argudiatu du ez duela emaitzak hobetzeko denborarik izan duela bi hilabete lehen ministro kargua hartu zuenetik. «Gobernatzen dutenekiko eszeptizismoari» eta Francois Hollanden gobernuak egindako zerga igoerei egotzi die beherakada: «Zergak gehiago jaitsi behar dira, egoera jasanezina bilakatu baita».