Noiz sortua: 2019-04-24 00:30:00

EBko hamahiru estatuk superabita izan zuten iaz

Defizit publikoa %0,6ra jaitsi da, eta Errumaniak eta Ziprek baizik ez dute gainditu %3ko gehienezko muga.

Berria -

2019ko apirilak 24
BRUSELA. Kontuak orekatzen jarraitzen dute Europako Batasuneko kide gehienek. Hazkunde ekonomikoari esker, defizit publikoa murrizten aritu dira azken urteetan, eta 2018an 99.000 milioi euroren desoreka baizik ez zuten pilatu batasuneko 28 kideek, barne produktu gordinaren %0,6. 2015ean, berriz, %2,3koa izan zen defizita.

Defizitaren aurkako gerra muturrera eraman eta kontu publikoak gorritik beltzera igaro dira dagoeneko hamahiru estatu kidetan. Superabita dutenen artean daude Luxenburgo (+%2,4), Alemania (+%1,7), Herbehereak (+%1,5) eta Grezia (+%1,5). Irlandak parean bukatu du urtea, eta hamalau estatuk defizita izan dute. Aspaldiko partez, %3ko defizit mugatik behera geratu da Espainia: %2,5eko defizita du, Frantziak bezainbestekoa. Mugan edo hortik gora soilik Errumania (-%3) eta Zipre daude (-%4,8).

Herrialde batzuen defizitak eragotzi egin du zor publikoa txikitzea. Guztira, 12,7 bilioi euro zor dituzte EBko kideek, 2017an baino 135.000 milioi gehiago. Baina ekonomia gehiago handitu denez, zorraren zama BPGaren %81,7tik %80ra txikitu da. BPGarekin neurtuta, Greziak (%181,1), Italiak (%132,2) eta Ziprek (%102,5) soilik handitu dute zorra. Frantziak 2017ko zorrari eutsi dio (%98,4), eta Espainia gutxien txikitu dutenen artean dago, puntu bat baizik ez baitu jaitsi, %97,1eraino. Zor gutxien Estoniak (%8,4) eta Luxenburgok dute (%21,4).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna