Harremana normalizatu dute Israel eta Sudanek

JERUSALEM. Arabiar Emirerri Batuekin eta Bahrainekin egin bezala, Israelek «harremanak normalizatzeko» ituna sinatu du Sudanekin.

Donald Trump AEBetako presidenteak eman zuen erabakiaren berri, atzo, eta Benjamin Netanyahu Israelgo lehen ministroak akordio «historikoa» dela azaldu zuen, beste herrialde musulman bat gehitu delako «bakearen zirkulura». Netanyahuk aurreratu zuen Israelgo ordezkaritza bat eta Sudango beste bat elkartuko direla «laster» bien arteko «elkarlana» zehazteko hainbat arlotan, «nekazaritza eta merkataritza barne».

Abdalla Hamdok Sudango lehen ministroak, berriz, eskerrak eman zizkien AEBei, herrialdea «terrorismoa» sustatzen duten estatuen zerrendatik kentzeagatik. Sudanentzat «onenak diren nazioarteko harremanak» lantzen ari dela adierazi zuen.