«Mespretxuzko tratua» egotzi dio LABek Jaurlaritzari

BILBO. Osakidetzako garbiketa zerbitzuko langileak «mespretxuz tratatzea» leporatu dio LABek Eusko Jaurlaritzari. Salatu du langileek komunikabideen bitartez jakin dutela Osakidetzak sindikatuen enpresekin itundutako aurreakordioa onartu duela. LAB, UGT, CCOO eta ESK-k egin zuten aurreakordioa. LABek gaitzetsi du Gotzone Sagarduik esan izana Osakidetzak beharrezko lanak egin dituela gatazka amaitzeko; izan ere, sindikatuak dioenez, langileak «mespretxuz» tratatu ditu gatazka osoan, eta Osakidetza «eragile pasibo» izan da.

Bide beretik, azaldu dute «gaur egun langileek ez dituztela edukiak zehatz-mehatz ezagutzen». Adierazi dutenez, langileak bihar biltzera deitu ditu Eusko Jaurlaritzak, «proposatutako behin betiko testua ezagutzeko». Sindikatuaren iritziz, «argi» geratu da, esandakoak gorabehera Osakidetzak bazuela gatazka honetan zeresanik; hain zuzen ere, haren oniritzia beharrezkoa izan delako.