Catenak Osasunan jokatuko du, eta Traorek, Realean
FUTBOLA. Osasunak eman du datorren denboraldirako egin duen lehen fitxaketaren berri. Talde gorritxoan jokatuko du Alejandro Catena atzelariak. Rayon jokatu du orain arte, eta kontratua amaituta ailegatu da Iruñera. 2028ko ekainaren 30era arte da hitzarmena.
Rayorekin 71 partida jokatu ditu azken bi denboraldietan. Buruz ahalmen handiko jokalaria da, eta oldarkorra defentsako lanean. Pozik azaldu da Osasunara iristeagatik. «Uste dut antzekotasun handia dagoela Rayoren eta Osasunaren artean. Ilusioz nago lanean hasteko. Osasunak asko dauka, eta ni nire ekarpena egitera nator. Espero dut asko gozatzea».
Realean jokatuko du, berriz, Hamari Traorek. 31 urteko atzelaria da, eta eskuin hegalean aritzen da; Malin sortua da. Hain zuzen ere, Maliko selekzioko kapitaina da. Libre iritsiko da, Reensekin zuen kontratua amaitu eta gero. Europako txapelketetan eskarmentua du; izan ere, aurreko sasoian Txapeldunen Liga jokatu zuen, eta denboraldi honetan, Konferentzia liga. 2025eko ekainera arte sinatu du.
Bestalde, talde txuri-urdinak atzo jakinarazi zuen Cecilia Marcosek beste bi urterako luzatu duela kontratua: 2025eko ekainera arte, hain zuzen ere. Azken bi denboraldietan, bi lesio larri izan ditu: belaun bakoitzeko lotailu gurutzatua apurtu baitu. «Oso pozik nago, taldearen egunerokora itzultzeko irrikaz. Orain arte, lesioak tarteko, ezin izan dut nire onena eman. Baina hemen segitzeak izan nahi dudan jokalaria bihurtzen lagunduko dit».
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
