Madrilgo Alcala hotelean ere, Muguruza eta Brouard gogoan

Madrilgo Alcala hotelean hil zuten tiroz HBko diputatu Josu Muguruza. 24 urteren ondoren, leku berean elkartu ziren atzo ezker abertzaleko eta Amaiur koalizioko hainbat kide, Muguruzaren eta Santi Brouarden hilketak gogoratzeko. Besteak beste, han izan ziren Rufi Etxeberria, Joseba Permach eta Karmelo Landa, eta Xabier Mikel Errekondo eta Rafa Larreina Amaiurreko diputatuak. «Ezker abertzalea gatazkaren konponbiderako lantzen ari ziren unean hil zituzten Santi eta Josu, bide horiek ixteko asmoz», esan zuen Etxeberriak. Espainia oraindik ere «bakearen etsai» dela salatu zuen, «bakea eta askatasuna lortzeko konpromisoa» berrestearekin batera.