Ceutako hesia pasatu dute 600 migratzailek

CEUTA. 602 migratzailek Ceutako hesia zeharkatzea lortu zuten atzo, eta beste ehunka Marokon geldiarazi zituzten Espainiako hiri horretara sartzen ahalegintzen ari zirenean. Afrikako migratzaileek muga zeharkatzeko aspaldian egin duten saiakerarik handiena izan da. Mugaren beste aldean Espainiako Polizia zuten zain, eta liskarrak sortu ziren horien eta migratzaileen artean. Gurutze Gorriak jakinarazi du 132 migratzaile zauritu zituztela, eta 11 ospitalera eraman behar izan zituztela. Poliziaren arabera, hesia igaro ondoren, migratzaileek agenteei eraso zieten, bidea ez ziezaieten galaraz. Espainiako Gobernuak hesietatik xafla zorrotzak kendu zituen, migratzaileei eragiten zizkieten zauriengatik. Horiek berriro jartzeko eskatu du Guardia Zibilak, Espainiako soldaduek babes gehiago izateko.