EAko kritikoek salatu dute «isilarazi» egin nahi dituztela

BILBO. EA Eusko Alkartasunako ildo kritikoak salatu du «jasanezina» dela alderdiaren barruan duten egoera, eta adierazi dute alderdiko ildo nagusiak «isilarazi» egin nahi dituztela. Bilbon elkartu ziren atzo alderdiko ildo kritikoko kideak. Bertan izan ziren, besteak beste, Karlos Garaikoetxea lehendakari ohia eta Maiorga Ramirez EAko idazkaritzarako hautagaia, bai eta Iratxe Lopez de Aberasturi, Miren Aranoa, Mikel Goenaga eta Esther Korres ere. Azken horiei diziplina espedientea zabaldu die alderdiko zuzendaritzak. Ingurumen Sailburu izandako Esther Larrañagak ere hartu zuen hitza, eta, adierazi zuenez, modu «antidemokratikoan» jokatu du alderdiak. Kritikoen arabera, alderdi barruan eztabaida zabalik dago, baina zuzendaritzak ez du jakin horri konponbidea ematen. Aurrez ere ildo kritikoak «ahotsik ez ematea» egotzi izan dio zuzendaritzari. Dokumentuak faltsutzea egotzita helegite bat jarri zieten kritikoek alderdiko buruei, baina epaitegiak ebatzi zuen ez zuela delitu zantzurik ikusi.