Hegoaldean %33 ugaritu dira genero indarkeriaren salaketak

MADRIL. CGPJ Espainiako Botere Judizialaren Kontseilu Nagusiak genero indarkeriaren alorrean duen behatokiak emandako datuen arabera, Hego Euskal Herrian 2.246 salaketa jarri ziren aurtengo hirugarren hiruhilekoan, iazko epe berean baino 566 gehiago: %33,7 ugaritu dira salaketak uda batetik bestera. Igoera bereziki handia izan da Nafarroan: 656 salaketa izan ziren uztailetik irailera, eta 2021eko aldi berean, berriz, 358; hau da, %83,2 igo dira aurten. EAEn, berriz, 1.590 emakumek salatu dute bortizkeria aurtengo udan, eta, iazkoan, %20 gutxiago izan ziren: 1.322.

Biktimen artean, bederatzi adingabe daude: bost EAEn eta lau Nafarroan. Era berean, 374 babes agindu eskatu ziren aurtengo udan epaitegietan, eta horietatik 279 onartu egin zituzten: ia hiru laurden.

Erakunde publikoek egunero dute indarkeria matxistarekin lotutako kasuen berri. Atzo, 39 urteko gizon bat atxilotu zuten Gasteizen, bertara zihoan autobusean emakume bati ukituak egin zizkiolakoan; sexu-eraso delitu bat egotzi diote. Halaber, Donostian gizon baten aurkako epaiketa hasi zen atzo: 2017an alabaren lagun adingabe bati ukituak egitea leporatuta, bost urteko kartzela zigorra eskatu du fiskalak. Gaur ere beste gizon baten aurkako epaiketa abiatuko da Gipuzkoako Epaitegian: igerileku batzuetan hiru adingaberi ukituak egiteaz akusatuta, bederatzi urteko kondena galdegin du fiskalak.