Hondakinen kudeaketa publiko bihurtzea nahi dute

GASTEIZ. «Gardentasunez» jarduteko eskatu dio Ekologistak Martxan-ek Eusko Jaurlaritzari, eta hondakinen kudeaketa «publikoa» izateko, eta ez «gutxi batzuen onurarako negozio bat». Horrela adierazi du Arantxa Tapia Eusko Jaurlaritzako Ekonomiaren Garapen, Iraunkortasun eta Ingurumen sailburuak hondakinen kudeaketarako plan berria aurkeztu ondoren. Planean, hiru zabortegi handitzeko asmoa biltzen da, trantsizio moduan, eta beste bi irekitzekoa. 2030ean botakinak egungoen %15 izatea aurreikusten du, eta ordura arte sortzen diren hondakinak kudeatzeko handitu nahi ditu zabortegiak. Ekologistek, ordea, esan dute helburu hori ez dela «errealista», «egungo joera kontuan hartuta». Uste dute 2030. urtetik aurrera ere zabortegiek martxan jarraitu beharko dutela.