Nievesen eta Goikoetxearen artean, kontziliaziorik ez

Nafarroako Justizia Auzitegian adostasunik gabe bukatu zen atzo Idoia Nieves Nafarroako Ogasuneko zuzendari ohiaren eta Lourdes Goikoetxea Nafarroako presidenteordearen arteko kontziliazio ekitaldia. Nievesek otsailaren 11n Nafarroako Parlamentuan egindako agerraldiaren biharamunean aurkeztu zuen Goikoetxeak kontziliazio eskaera auzitegian. Egindako akusazioak frogatzeko eskatu zion Nievesi, edo bestela, esandakoak erretiratzeko. Atzoko saioan, Nievesek idatzi batean adierazi zuen Goikoetxeari ez ziola leporatu legearen kontra jardutea eta hala ari zela uste izan balu fiskaltzara joko zuela zuzenean. Ohar horretan azaltzen duenez, gainera, berak «inongo momentutan» ez zuen adierazi Goikoetxea bere karguaz baliatu zenik interes partikularrak lortzeko. Esanak esan, bien arteko kontziliazio saioa adiskidetzerik gabe bukatu zen. Goikoetxearen abokatu Ignacio del Burgoren arabera, Nievesek ez zituen aurkeztu froga berriak lehen parlamentuan esandakoak egiaztatzeko. Hori dela eta, Nievesen aurkako balizko ekintza judizialak aztertuko ditu Del Burgok.