CAFek Palestinan Nazioarteko Zuzenbidea urratzen jarraituko du

CAF, Jaitsi Zaitez Israelen Apartheidaren Trenetik kanpainak bi urte bete berri ditu —otsailaren 22an—, eta, beraz, kanpaina sustatu genuen koaliziotik txosten bat egin dugu azken bi urteetan egindako ekimen eta ekintzen berri emateko.

CAFek Palestinako okupazioarekin duen konplizitatea salatzeko Euskal Herrian bultzatutako ekintzez gain, gaur egun, CAF Jerusalemen eraikitzen ari den tranbiaren aurkako kanpaina nazioarteko ekimen bihurtu da.

Alde horretatik, Frantzia, Norvegia edo Erresuma Batuko Palestinarekin Elkartasunerako Taldeek hainbat ekintza jarri dituzte abian, herrialde horietan CAFen kontratuak berritzea saihesteko edo lizitazio berrietatik kanporatzeko.

Bestalde, nazioarteko erakundeetan borroka juridikoa ere ildo estrategiko gisa nabarmentzen da. CAF Harremanetarako Puntu Nazionalera (Industria Ministerioa) eraman dute multinazionalen jokabide-arauak ELGEren irizpideen arabera ez errespetatzeagatik. Eta hainbat sektorek (akademikoak, sozialak, juridikoak) azpimarratu dute CAF Nazio Batuen datu-basean sartu behar dela, Israelen okupaziotik eta legez kanpoko kolonietatik irabaziak lortzen dituzten 112 enpresa biltzen dituen datu-basean, hain zuzen.

Ondorioz, CAF eta haren langileak etorkizun are ziurgabeago batera arriskatzen dira orain, Veolia multinazional frantsesaren aurrekariak ez baitu ezer onik iragartzen CAF bezalako enpresa kaudimendun eta ondo kokatuarentzat. 2008an, Bilboko Ekimena behin betiko bultzada izan zen, Veoliak, zazpi urte geroago eta kontratuetan milioi askoren galerak izan ondoren, Jerusalemgo tren arinaren linearen kudeaketan eta mantentze-lanetan zituen partaidetza guztiak saltzea erabaki zezan.

Bai, CAFek orain zabaldu nahi duen proiektu berdinean. Horregatik, dei egiten diegu herritarrei eta gizarte, kultura eta politikako eragileei CAF presionatzen jarrai dezaten, Palestinako beren tranbia errailetik atera dadin eta nazioarteko zuzenbidearen errailetara itzul dadin.