EAEko herritarren %81 euskal presoek zigorrak osorik betetzearen kontra dago, inkesta baten arabera

Hamar urteko epean, 1996tik 2006ra, erdira jaitsi da euskal preso politikoek zigorrak osorik betetzearen alde dauden Araba, Bizkaia eta Gipuzkoako biztanleen ehunekoa: %18 ziren orain hamar urte, eta %9 egun. EHU Euskal Herriko Unibertsitateak iritzi publikoari buruz aldiro-aldiro egiten duen azterketaren emaitzetako bat da.

Inkesta horren arabera, zigorrak osorik betetzearen aldekoak gutxitu diren bezala, preso horiek "gizarteratzearen" aldekoak gero eta gehiago dira. Hala, iragan maiatzean, ETAk su-etena eman eta bi hilabetera, Araba, Bizkaia eta Gipuzkoako herritarren %41 odol deliturik ez duten euskal preso politikoak "gizarteratzearen" alde zegoen erakunde horrek armak uzten baditu; beste %4 0preso horiekin guztiekin jokabide hori izatearen alde, baita odol delituak dituztenekin ere. %9 baino ez dira ETAk armak utziz gero zigorrak osorik betetzearen aldekoak.

Duela hamar urte inkestatuen %18 zegoen zigorrak osorik betetzearen alde. ETAko preso guztiak "gizarteratzearen" aldekoak duela hamar urte baino %7 gehiago dira orain, eta %10 gehiago odol delituak dituztenak ezik gainontzekoak "gizarteratzearen" aldekoak.