Hirukoaren lehendakaritarako hautagai Juan Jose Ibarretxek egindako proposamen nagusiak bere egin ditu EAk, Unai Ziarreta legebiltzarkideak inbestidura saioan egin duen hitzaldiaren bidez. Hain justu, bakea eta normalizazioa lortzeko akordio politiko berri bat behar dela agertu du Ziarretak Ibarretxek bezalaxe, eta ezinbestean, akordio horrek bi oinarri behar dituela nabarmendu du: batetik, Euskal Herria —zazpi herrialdeak aintzat hartuta— subjektu politiko dela, eta, bestetik, euskal herritarrei etorkizuna erabakitzeko eskubidea aitortzea. Ziarretak esan du, bi gako horiek eztabaidatu eta horren inguruan adostasunik lortu gabe ez dela posible normalizazioa; alegia, baldintza hori bete gabe gerta daitekeela indarkeria amaitzea eta bakea lortzea, baina, hala ere, normalizazio politikoa ez litzatekela erdietsiko.
Ildo horretatik, PSEri egotzi dio emokrazian herri proiektu guztiei buruz mintzatzea posible dela esan arren, proiektu horiek gauzatzeko bidean jartzea eragozten dutela. Hain zuzen ere, EAk defenditzen herri proiektua (Euskal Herriko Errepublika) aurrera eramateko eragozpen handiena Espainiako Konstituzioa dela ohartarazi du. Hori dela eta, proiektuei buruz hitzegiteko eskubidea ez ezi, "gauzatzekoa" aldarrikatu du.
Herri proiektuei buruz mintzatzeko eskubidea ez ezik, "gauzatzekoa" aldarrikatu du EAk
Iruzkinak
Ez dago iruzkinik
Ordenatu
