Iosu Murgia (Aralar): "Etorkizunean agian ezker abertzalea berreraiki ahal izango dugu"

Aralarrek 2011ko hauteskundetan Bizkaian eta Bilbon izango dituen zerrendaburuen aurkezpenean, Iosu Murgia Batzar Nagusietarako hautagaiak esan du Aralarren ustez ezker abertzaleak 2011ko hauteskunde horietan parte hartu ahal izan behar duela. Gainera, etorkizunean "agian ezker abertzalea parametro berri batzuetan berreraiki" ahal izango dutela gaineratu du. "Aralarrek ez du bere alternatiba politikoa inorekin alderatzeko beldurrik, eta epe ertain edo luze batean, ezker abertzale berri bat berreraiki ahal izango dugu, parametro berriekin". Bitartean, norberak bere proiektua babestu behar duela gaineratu du, eta edonork horretarako aukera izan behar duela.